1 Álggahus

Sámediggi ásahuvvui geassemánus 12. beaivvi 1987 lága nr.56 vuođul, mii lea Sámedikki ja eará sámi riektegažaldagaid birra (sámeláhka). Sámediggi ásahuvvui vuosttažettiin ovddasteaddji álbmotválljen ásahussan sápmelaččaid bokte sápmelaččaid várás, ja dađistaga leat Sámediggái sirdon eambbo doaimmat ja váldi lágaid ja/dahje láhkaásahusaid vuođul máŋgga suorggis. Sámediggái lea addon eambbo ovddasvástádus ja iešheanalašvuohta bušeahttaoktavuođas dan bokte ahte Sámediggi oažžu juolludemiidis 50-poasttaid bokte, ja leat ásahuvvon vuogit das movt Sámediggi ja stáhta eiseválddit galget čađahit ráđđádallamiid.

Sámedikki 2012 jahkedieđáhus mearriduvvui Sámedikki dievasčoahkkimis guovvamánu 28. beaivvi 2013. Jahkedieđáhusas čielggada Sámediggi iežas politihkalaš barggu, daid doaimmaid maid Sámediggi hálddaša ja iešguđetlágan ekonomalaš ja hálddahuslaš hástalusaid. Jahkedieđáhus čuovvu 1. mielddusin. Sámedikki 2012 rehketdoallu čuovvu 2. mielddusin.

Dán stuoradiggedieđáhusas leat muhtun áššit Sámedikki jahkedieđáhusas gessojuvvon ovdan, ja departemeanta kommentere muhtun dain áššiin. Čilgejuvvo maiddái makkár ráđđádallamat leat čađahuvvon Sámedikkiin 2012:s ja 2013 vuosttaš jahkebealis.