Bearráigeahčču, dárkkisteapmi ja čuovvuleapmi
Artihkal | Maŋimuš ođasmahttojuvvon: 09.01.2023 | Kultur- ja dásseárvodepartemeanta
Lotteriijageahčču ásahuvvui 2001 geahččoorgánan, mii hálddaša ja dárkkista priváhta lotteriijaid ja stáhtalaš spealuid. Stuorradiggi háliida buorebut gozihit Norgga speallan- ja lotteriijamárkana, mii lea viidumin.
Lotteriija- ja vuođđudusgeahčču dárkkista ja bearráigeahččá čuvvot go oktavuoigatvuođalaččat Norsk Tipping ja Norsk Rikstoto ja priváhta lotteriijaaktevrrat gustovaš lágaid. Bearráigeahčču maid meannuda ohcamušaid servviin ja joavkkuin mat háliidit lágidit vuorbádemiid, maid gávpejohtu lea eanet go 200 000 kruvnnu.
Lotteriijabearráigeahčču galgá maid dárkkistit Grasrotandelen-ortnega ja goziha ruhtaspeallosuorggi vielgadinbassanlága vuođul.
Bearráigeahču dehálaš doaibma lea eastadit Norgga lotteriija- ja ruhtaspeallanfálaldagaid negatiiva váikkuhusaid ja vuhtiiváldit speallansorjavaččaid. Dan lassin bearráigeahčču galgá fuolahit ahte ruhtaspealuid ja lotteriija sisaboađut juogaduvvojit ideála ulbmiliidda.
Lotteriija- ja vuođđudusgeahčus leat maid eará doaimmat, mat eai laktás ruhtaspeallopolitihkkii, nu mo gozihit vuođđudusaid vuođđuduslága vuođul ja hálddašit eaktodáhtolaš servviid lassiárvodivada buhtadusortnegiid ja valáštallanrusttegiid lassiárvodivada ruovttoluotta máksima.
Eanet dieđut Lotteriijageahču bearráigeahččan- ja dárkkistanbarggus: Gozihit ja dárkkistit - Lottstift
Speallansorjavašvuohta
Speallansorjavašvuođa sáhttá gohčodit váddun, mas olmmoš dávjá ja máŋgii gártá dakkár dillái, mas speallan šaddá olbmo eallima váldun, nu ahte dat bilida sosiála-, bargo-, ávnnaslaš- ja bearašoktavuođaid.
Ráđđehus lea áigodahkii 2022-2025 ráhkadan doaibmaplána speallanváttisvuođaid vuosttaldeapmái. Plána váldoulbmilat leat:
- Nu unnán olbmuin go vejolaš galget leat speallanváttisvuođat
- Galgá lasihit ja gaskkustit máhtu spealuid ja speallanváttisvuođaid birra
- Speallanváttisvuođaid galgá árrat fuomášit ja bures čuovvulit
Álbmotiskkadeapmi
Lotteriijageahčču dahká jeavddálaččat álbmotiskkademiid speallansorjavašvuođa birra. Maŋimuš iskkadeapmi ovdanbuktojuvvui 2020: Ruhta- ja dáhtaspeallanváttisvuođat Norggas 2019 (Omfang av penge- og dataspillproblemer i Norge 2019) (.pdf)(uib.no)
Spealat go don dahje muhtun gean dovddat menddo dávjá?
Innlandet HF Sanderuda buohcceviessu doaimmaha Lotteriija- ja vuođđudusgeahčuin ovttas telefovdnabálvalusa sin várás geain leat ruhtaspeallanváttisvuođat. Hjelpelinjen neahttabáiki.
Loga maid Norsk Tipping neahttasiidduin: www.spillevett.no