Ođasmahttojuvvon dienasvuogádat fylkkagielddaide

Almmustahttináigodat Solberga ráđđehus

Almmustahtti: Gielda- ja ođasmahttindepartemeanta

Boahttejagi gielddaođastusa oktavuođas ráđđehus árvala fylkkagielddaide ođđa dienasvuogádaga.

Boahttejagi gielddaođastusa oktavuođas ráđđehus árvala fylkkagielddaide ođđa dienasvuogádaga.

-Dienasvuogádaga ulbmil lea ruđaid juogadit objektiivvalaččat, fylkkagielddaid ruhtageavaheami vuođul go sii hábmejit ássiide fálaldagaid.  Vuogádat ii leat rievdaduvvon 20 jahkái. Dienasvuogádaga gullevaš eavttut ja ruhtajuogadeamit eai govve fylkkagielddaid dálá goluid ja dárbbuid.  2005:s juo dieđihuvvui ahte vuogádat berrešii ođasmahttojuvvot. Dál mii dahkat dan, cealká gielda- ja ođasmahttinministtar Jan Tore Sanner.

Daid maŋimuš jagiid lea ollu dáhpáhuvvan ja fylkkagielddaid dienasvuogádat ii soaba šat otná dárbbuide. Veahkadatovdáneapmi, ássanminsttar, siskkáldas struktuvra, mátkkoštanvierut ja eallindilli leat earáhuvvan. Dál árvaluvvojit ođđa golločoavdagat mat galget vuhtiiváldit rievdaduvvon fálaldatdárbbuid ja láhčit dili dásseárvosaš bálvalusaide .

-Ođđa vuogádat mielddisbuktá govttolaš ruhtajuohkima, fylkkaid dálá dárbbuid ektui.  Dat addá buoret vuođu ovddidit dásseárvosaš bálvalusaid miehtá riikka. Dienasvuogádat lea áiggi mielde šaddan eahpegovttolaš, dadjá Sanner.

Seammás árvaluvvo seammalágan vearrodássenortnet go gielddain. Fylkkagielddat mat vearuhuvvojit badjel riikka gaskameari ožžot gessosa, ja fylkkagielddat main leat vearroboađut uhcit go riikka gaskameari ožžot lassidoarjaga.

Dan sivas go lea mannan nu guhkes áigi dan rájes go maŋimuš revišuvdna lea dahkkon, de šaddet stuora juolludanváikkuhusat. Rievdadusat čađahuvvojit dađistaga 5 jagi badjel. Fylkkagielddat ožžot de áiggi heivehit iežaset ođđa vuogádahkii.

Sirdásanortnega lassin árvaluvvo 95 miljovnna kruvnnu sturrosaš buhtadus daid fylkkagielddaide gos rámmadoarjja geahpeduvvo 200 kruvnnuin juohke ássi nammii go ođđa golločoavddaortnet fápmuduvvo.