Ođasmahttojuvvon mearrádusat suddjet mánáid mediabuvttadeami vahátlaš váikkuhusaid vuostá

Láhkaproposišuvdna (girjegillii)

Mediavalljodat ja mediageavaheapmi gáibit doaibmi ja beaktilis vuogádaga mii suddje mánáid ja nuoraid,  ja dárbu ii leat leamaš goassige nu stuoris go dál, cealká  kulturministtar Thorhild Widvey. 

-2013 čalmmustahtii filbmabearráigeahču čuohtejagiávvudeami Norggas. Dál lea áigi heivehit mearrádusaid ođđa mediamáilbmái ja ásahit oktasaš suddjenvuogádaga mii gusto buot mediaide, dadjá stáhtaráđđi.

Teknologalaš ovdáneapmi lea mielddisbuktán ahte mediafálaldagat ja audiovisuálavalljodat leat sakka lassánan. 2013 geavahedje norgga mánát ja nuorat gaskal 9 ja 15 jagi juohke beaivvi gaskamearálaččat lagabui 4 diimmu geahččat TV, Interneahta, DVD ja kino. Go audiovisuála mediat dađistaga ožžot stuorit saji mánáid eallimis, de stuorru maid riska ahte muhtun fálaldagain lea dakkár sisdoallu mii mánáide lea vahágin.

Láhkaárvalusa váldoulbmil lea ahte oažžut sadjái bealátkeahtes mearrádusaid dán suorgái. Árvalus mearkkaša ahte filbma- ja videográmmalága ja áibmomedialága dálá mearrádusat  ovttastahttojuvvojit, ođasmahttojuvvojit ja álkidahttojuvvojit. Árvalus ollašuhttá dan lassin   EO-direktiivva suddjenmearrádusaid mat gusket audiovisuála diŋgonbálvalusaide. (AMT-direktiiva).

Ráđđehus árvala láhkaárvalusa bokte láhkamearridit golbma suddjendoaimma (geatnegasvuođaid) mat gullet buot daid gaskkustanvugiide maidda láhka gusto:  

1. Geatnegasvuohta bidjat ahkemeari filmmaide/prográmmaide – beroškeahttá movt dat gaskkustuvvojit;  kinos, TV:s, videos dahje neahtas.  
2. Geatnegasvuohta geavaheddjiide almmuhit ahkemeari čielgasit ja bealátkeahttá.
3. Geatnegasvuohta bidjat doaimmaid johtui sihkkarastin dihtii ahte ahkemeari mearrádusat čuvvojuvvojit.