Ahtanuššanovddideaddji vearro- ja divatgeahpádusat

Ráđđehusa vearro- ja divatevttohus 2018 čuovvula vearroođastusa mii Stuoradikkis lea soabaduvvon.

– Ráđđehus addá vearrogeahpádusaid mat ovddidit ahtanuššama ja investeremiid norgga bargosajiin. Mii vuolidat vearromáksomeari olbmuide ja fitnodagaide, ja háliidat ahte galgá eanet gánnáhahtti investeret Norggas, lohká finánsaministtar Siv Jensen (OB).

Ráđđehus evttoha ođđa vearro- ja divatgeahpádusaid oktiibuot 3 miljárdda kruvnnu ovddas, girjejuvvon 0,7 miljárdda kruvdnui bušeahttajagis. Ráđđehusa evttohus mielddisbuktá ahte dán ráđđehusa netto vearro- ja divatgeahpádusat dahket sullii 26 miljárdda kruvnnu.

Ráđđehus čađaha dehálaš osiid vearroođastusas maid Stuoradikki stuora eanetlohku lea dorjon diibmá. Dábálaš sisaboađuid vearromáksomearri vuoliduvvo 24 proseanttas 23 prosentii sihke fitnodagain ja ovttaskas olbmuin, ja árvobidjanvuoládus ossosiidda ja  doallobiergasiidda lasihuvvo 10 proseanttas 20 prosentii. Ráđđehus evttoha vel ahte ii galgga dárbbašit máksit opmodatvearu buvttadanbargoreaidduid ovddas. Ráđđehusa evttohuvvon vearrovuogádat movttiidahttá ealáhuseallima eanet  investeret ja álggahit ođđa bargosajiid Norggas.

Ráđđehus láhčá dili ruoná vearromolsumii. 2018 bušeahtta čalmmustahttá maid birasvahágat mákset ja sisttisdoallá rievdadusaid mat buoridit dálkkádat- ja birassuorggi divatvuogádaga bokte.

Eanet dieđut ráđđehusa jagi 2018 vearro- ja divatevttohusa birra leat vearrorievdadusaid diehtogálduin.