Áigu loktet sámi ealáhuseallima ođđa geaidnokárttain
Preassadieđáhus | Almmustahtton: 28.02.2024 | Ealáhus- ja guolástusdepartemeanta
Ráđđehus áigu ovttasráđiid Sámedikkiin ráhkadit sámi ealáhuseallima geaidnogártta. Ulbmil lea nannet ealáhusovddideami sámi guovlluin.
Odne, riikkaidgaskasaš ealáhuskonferánssas Sápmi Business Conference Guovdageainnus, muitalii ealáhusministtar Jan Christian Vestre ođđa ođđa sámi ealáhusáŋgiruššama birra.
Sártnistis son dovddahii movtta árjjalaš sámi ealáhusbirrasa ektui ja deattuhii man dehálaš máŋggabealat ealáhusdoaibma lea vai olaha ceavzilis báikkálaš servodagaid.
– Mii áigut veahkkin luvvet sámi ealáhuseallima vejolašvuođaid ja ain joatkit ovddidit daid menestusaid mat leat dáppe Sámis. Mis lea nanu áigumuš láhčit diliid ealáhusovddideapmái mii ii dušše hága árvvuid ja bargosajiid, muhto maiddái áimmahuššá ja ovddida sámi kultuvrra ja identitehta, dadjá ealáhusministtar Jan Christian Vestre.
– Sámi ealáhusaid geaidnokárta lea reaidun identifiseret ovdánanvejolašvuođaid olles ealáhuseallima viidodagas. Lea sáhka árbevirolaš sámi ealáhusaid viidáset ovddideamis ja daid vejolašvuođaid geavaheamis mat gávdnojit surggiin nugo mátkeealáhusas, hutkás ealáhusain ja eará sámi kulturvuđot doaimmain, dadjá ealáhusministtar.
Háliida oaiviliid ealáhuseallimis
Geaidnokárta-bargu lea oaivvilduvvon lassin Sámedikki iežas ealáhusovddidanbargui. Buorre ovttasbargu Sámedikkiin ja buorre gulahallan sámi organisašuvnnaiguin, ealáhusaktevrraiguin ja máhttobirrasiiguin lea guovddážis jus galgat joksat buori bohtosa.
– Sámis leat ollu čeahpes ja hutkás ealáhusdoallit. Mu mielas lea dehálaš ahte sámi ealáhusat ožžot ovdánanvejolašvuođaid, ja dainna lea Sámediggi bargan máŋga jagi. Mun sávan ahte geaidnogárta šattašii dehálaš veahkkin ja ahte ealáhusaktevrrat miehtá Sámi buktet oaiviliid, dadjá sámediggepresideanta Silje Karine Muotka.
– Dán geaidnogárttas leat ođđa doaibmabijut sámi ealáhusaid várás, ja mun ávžžuhan buohkaid buktit oaiviliid dán bargui. Go ovttastahttá fámuid, de sáhttet stuora áššit dáhpáhuvvat, dadjá ealáhusministtar.
Boahttevuođas galget lágiduvvot máŋggat cealkámuščoahkkimat, ja buohkat leat bures boahtin sáddet iežaset cealkámušaid Ealáhus- ja guolástusdepartemeantta poastavuostáváldimii.