Ođastuvvon nationálabušeahtta

Dorvovuostáiváldinbáikkis lassi mánnáfágalaš gelbbolašvuohta

Ráđđehus evttoha juolludit 17,2 milj. ruvnnu mánnáfágalaš gelbbolašvuođa nannemii dorvovuostáiváldinbáikkiin.

–  Báhtareaddji mánát lea hirbmat rašes joavku, ja dáhtošeimmet ahte Norgii boahtti mánáid galgá vuostáiváldit oadjebas ja buori vuogi mielde, nu ahte sin vuoigatvuođat ja dárbbut fuolahuvvojit. Dáinna liigeruđain sáhttet vuostáiváldinbáikkit virgádit eanebuid geain lea mánnáfágalaš gelbbolašvuohta ja gozihit ahte mánát buorebut čuovvuluvvojit vuostáiváldinbáikkiin, dadjá justiisa- ja gearggusvuođaministtar Emilie Mehl.

Dál leat eahpedábálaš máŋga máná dorvovuostáiváldinbáikkiin, ja eanaš ájihuvvon mánát Ukranias eret, bohtet dušše ovttain ovddasteddjiin. Lea hirbmat dehálaš ahte áimmahuššat mánáid ja ovddasteddjiid bures. Lea juo dáhpin ahte leat mánnáfágalaš gelbbolaš liigebargit ovttaskas vuolleahkahaččaid vuostáiváldinbáikkiin, muhto ná ii leat leamaš dábálaš vuostáiváldinbáikkiin. Doaibmabidju mearkkaša ahte jagis 2022 sáhttá ásahit mánnáfágalaš gelbbolašvuođavuđot virggiid buotlágan dorvovuostáiváldinbáikkiin gos leat mánát.


Badjel goalmmátoasi ájihuvvon olbmuin Ukranias Norgii leat mánát. Eatnašat sis leat boahtán dušše ovtta ovddasteddjiin. Olgoriikadirektoráhtta (UDI) ovddasvástida dorvovuostáiváldinbáikkiid doaimma ja čuovvuleami, ja fuolaha ahte ruhta mánnáfágalaš gelbbolašvuhtii geavahuvvo nu ulbmillaččat go vejolaš dorvovuostáiváldinbáikkiin miehtá riikka.