Láhkaevttohus Stáhta foandda birra Romssas
Preassadieđáhus | Nr: 14/2024 | Almmustahtton: 12.04.2024 | Ruhtadandepartemeanta
Ráđđehus lea odne ovddidan láhkaevttohusa ođđa foandda, Stáhta foandda, ásaheami birra Romsii. Álbmotoadjofoanda, mii dál hálddaša Norgga Stáhta penšuvdnafoandda ja Stáhta obligašuvdnafoandda, galgá hálddašit foandda.
Ođđa foandda rámmaeavttut nannejuvvojit lága
Stáhta foandda ásaheapmi Romsii galggašii hukset kapitálahálddašanbirrasiid Davvi-Norggas, ja foandda ruđaid investerema ulbmil lea olahit nu buori vuoittu go vejolaš dohkálaš riskka ektui. Goappaš bealit evttohuvvojit nannejuvvot lága bokte.
– Dál nannejuvvo ođđa stáhtafoanda Romssas lága bokte. Dat lea dehálaš ráđđehusa áigumuša hárrái ahte ásahit dehálaš bargosajiid ja nana birrasiid miehtá Norgga, oktan buot buriiguin maid dat sáhttet mielddisbuktit, cealká finánsaministtar Trygve Slagsvold Vedum (Gb).
– Dát lea dakkár doaibma mii buktá dehálaš bargosajiid Davvi-Norgii ja Romsii, muhto dat sáhttá maiddái geasuhit eará fitnodagaid ásaiduvvat dakkár ovttadaga lahka. Mun jáhkán ahte dát sáhttá áiggi mielde šaddat nana ja buorren birasin mii lea mávssolaš Romsii, dadjá finánsaministtar.
Ođđa foandda investerenstrategiija ii muddejuvvo lágas, dan galgá Ruhtadandepartemeanta mearridit lága vuođul. Láhka ii gieđahala foandda ruhtadeami ge.
– Álbmotoadjofoanda lea ovddidan buriid bohtosiid stáhtii guhkit áiggi, ja mun lean oalle sihkar ahte dát ođđa kantuvra, mii galgá ásahuvvot Romsii, joatká dan, dadjá finánsaministtar.
– Ráđđehus gieđahallá investerenstrategiija ja foandakapitála ruhtadeami reviderejuvvon nationálabušeahta oktavuođas miessemánus, dadjá Vedum.