Lihkku Sámi álbmotbeivviin!
Preassadieđáhus | Almmustahtton: 06.02.2023 | Gielda- ja guovlodepartemeanta
– Odne lea 30 jagi áigi go Sámi álbmotbeaivi čalmmustahttojuvvui vuosttaš geardde. Dađis eanet gielddat, organisašuvnnat ja dábálaš olbmot leat mielde ávvudeamen min sámi kultuvrra. Lea illudahti oaidnit ahte ávvudeamit viidot jagis jahkái, dadjá Gielda- ja guovloministtar Sigbjørn Gjelsvik (Gb).
Ráđđehus bargá dan ovdii ahte Norga galgá leat njunnošis eamiálbmotvuoigatvuođaid dáfus.
–Sámegielat galget leat ealli gielat, maiddái boahttevaš buolvvaide. Dat mielddisbuktá ahte mii dárbbašat gelbbolaš sámegieloahpaheddjiid mánáidgárddiin ja skuvllain. Ráđđehusa boahtte stuoradiggedieđáhusas sámi giela, kultuvrra ja servodateallima birra gieđahallojuvvo ge sámegieloahpaheddjiide rekrutteren, dadjá Gjelsvik
Duohtavuođa- ja soabahankommišuvdna almmuha raporttas geassit 2023
Duohtavuođa- ja soabahankommišuvdna guorahallá Norgga eiseválddiid dáruiduhttinpolitihka sápmelaččaid ja kvenaid/Norgga-Suoma álbmoga hárrái ja váikkuhusaid mat dáin vásáhusain leat leamaš sidjiide joavkun ja indiviidan.
– Dat ahte Duohtavuođa- ja soabahankommišuvdna geige raporttas dán jagi lea rivttes lávki seanadeapmái. Mii dárbbašat eanet máhtolašvuođa ja rabasvuođa dáruiduhttinpolitihka váikkuhusain, jos duohta seanadeami galggaš leat vejolaš ollašuhttit, dadjá Gjelsvik.
Sámi álbmotbeaivi
Sámi álbmotbeaivi čalmmustahttojuvvo vuosttaš sámi riikkačoahkkima muitun mii dollojuvvui Troanddimis guovvamánu 6.b. 1917. Beaivi čalmmustahttá sápmelaččaid oktavuođa riikkarájáid rastá Davvikalohtas. Beaivi ávvuduvvui vuosttaš geardde 1993:s ja dohkkehuvvui almmolaš leavgabeaivin Norggas 2004:s.
– Lea vuosttaš geardde go sámi áššiid ovddasvástideaddji stáhtaráđđin lean mielde ávvudeamen Sámi álbmotbeaivvi. Mun illudan ávvudeapmái, ja áiggun joatkit nannet ja ovddidit sámi kultuvrra ja sámegielaid, dadjá Gjelsvik.
Lihku Sámi álbmotbeaivái!
Læhkoeh biejjine – Vuorbbe biejvijn – Lihkku beivviin – Gratulerer med dagen!