Mediaeaiggátvuođaláhka árvaluvvo heaittihuvvot

-Sihke mediaealáhussii ja stáhtii šaddá álkit go mediaeaiggátvuođaláhka heaittihuvvo. Árvalus lea vuhtiiváldán moaitámušaid mat ollu jagiid leat ovddiduvvon mediaeaiggátvuođalága sisdollui, cealká kulturministtar Thorhild Widvey.

Ráđđehus árvala ahte eaiggátvuohta boahtteáiggis galgá muddejuvvot gilvolágas. Dušše Gilvobearráigeahčču galgá fuolahit mediasuorggi oastimiid ja ovttastahttimiid bearráigeahču. Gilvoláhka galgá heivehuvvot nu ahte dat buorebut go dál sihkkarastá mediavalljodaga almmá eaiggátvuođa sierranjuolggadusaid haga.  

Gilvolága rievdadusárvalus lea dál gulaskuddamis (girjegiella). Rievdadus dahká dál vejolažžan, go oastin- ja ovttastahttináššiid meannuda mediamárkanis, čielgaseappot deattuhit ahte mediavalljodaga gáržžideapmi ii leat buorre. Mediavalljivuođa gáržžideapmi heajos gilvvu geažil addá heajos kvalitehta geavaheddjiide. Dán árvalusa vuođul sáhtašii bissehit ovttastahttináigumušaid.

Gilvobearráigeahčču dat galgá ráđđádallat Mediabearráigeahčuin mii lea áššedovdiorgána ássiin mat gullet mediasuorggi ovttastahttimiidda.

Movt Gilvobearráigeahčču sáhttá/galgá deattuhit ja áimmahuššat mediavalljivuođa fitnodatovttastahttináššiin, galgá lagabui divaštallojuvvot gulaskuddannotáhtas mediaeaiggátvuođalága heaittiheami birra.

Dáid árvalusaiguin ráđđehus guođđá dan prinsihpa ahte reguleret mediaeaiggátvuođa mearriduvvon márkanráddjemiid vuođul. Dan sadjái galgá Gilvobearráigeahčču sáhttit árvvošallat gilvaleddjiid  mediamárkanis, movt márkanat leat huksejuvvon ja movt dat doibmet. Ekonomalaš ja fitnodatguoski áššiid lea dalle vejolaš vuđolaččat árvvoštallat juohke ášši oktavuođas.

Árvalusa ulbmil lea ahte mediafitnodagain lea dušše okta geatnegahtti láhka ja bearráigeahčču maid fertejit vuhtiiváldit go ovttastahttimiid ja oastimiid árvvoštallet. Dáinna rievdadusain eai dárbbaš mediafitnodagat Mediabearráigeahčuin čađahit árvvoštallama mediaeaiggátvuođalága mearrádusaid mielde.