Stáhtabušeahtta 2018

Ođđa innovašuvdnaortnet mediijade

Ráđđehusjulggaštusa ektui unniduvvo buvttadandoarjja ođas- ja áigeguovdilmediijaide 25,7 milliuvnna ruvnnuin. Ráđđehus evttoha várret 7 milliuvnna ruvnna ođđa innovašuvdnaguoski doarjjaortnega 2018:s. Dat mearkkaša dan ahte njuolggo preassadoarjja nettounnideapmi gártá 18,7 milliuvnna ruvnna.

Ráđđehus lea ođastan mediijapolitihkalaš gaskaoapmevuogádaga, ee. go lea luvven eret lassidivvaga máksingeatnegasvuođa elektrovnnalaš ođasmediijain ja neutrálavuđot buvttadandoarjagiin. Dál álggahuvvo fas ođđa rievdadeamit, go ásahuvvo innovašuvdnaguoski doarjjaortnet.

– Mediija máŋggabealatlávdegotti raporta čájeha ahte mediijat leat dál oalle hástaleaddji gaskadásis. Deháleamos maid mii sáhttit dál dahkat mediijasuorgái lea movttiidahttit ja veahkehit oččodit ođasteami ja innovašuvnna nu ahte mediijat sáhttet gávdnat bistevaš ja nanu boahttevaš gávpemodeallaid, lohká kulturministtar Linda Hofstad Helleland.

Dat ođđa ortnet galgá earenoamážit dustet journalisttalaš innovašuvnna ja báikkálaš aviissaid digitaliserema.

– Báikkálaš aviissat devdet dehálaš doaimma báikkálaš demokratiijas. Seammás lea smávit aviissaide main leat unnán resurssaid hástalus nákcet jorgalahttit iežaset digitála mediijaduohtavuhtii. Danne lea dat ođđa innovašuvdnaortnet earenoamážit jurddašuvvon sin ektui, lohka kulturministtar.

Innovašuvdnaguoski doarjjaortnet lei okta dain evttohusain maid Mediija máŋggabealatlávdegoddi buvttii NOU njukčamánu 7. B. 2017:s. Dat eará evttohusat maid lávdegoddi evttohii árvvoštallojuvvojit vuđolaččat ja ollislaččat stuoradiggedieđáhusas mii lea plánejuvvon ovdanbuktojuvvot ovdal 2018 geasi.