Raporta suohkaniid vásáhusaid birra sámediggeválggaid 2021 čađaheamis
Preassadieđáhus | Almmustahtton: 29.06.2022 | Gielda- ja guovlodepartemeanta
Ođđa raporta čájeha ahte suohkanat vásihedje sámediggeválggaid 2021 čađaheami hástaleaddjin. ¬– Mii váldit hui duođas dan maid suohkanat muitalit, ja mii háliidit lagas gulahallama Sámedikkiin go raporta galgá čuovvuluvvot geasset, dadjá gieldda- ja guovlluministtar Sigbjørn Gjelsvik (Gb).
Raporttas boahtá ovdan ahte olu suohkaniid mielas lei sámediggeválgga čađaheapmi hástaleaddji. Suohkanat oaivvildit earret eará ahte ii lean buorre go jienastanlihput maŋŋonedje, ahte lei boasttuvuohta jienastuslogus, ja go ii addojuvvon eanet diehtu ja oahpu suohkaniidda. Máŋga suohkana vásihedje maid ahte bargguid juohkin sámediggeválgga oktavuođas ii lean buoremus.
Vaikko čađaheapmi lei ge hástaleaddji, čađahuvvui sámediggeválga 2021 njuolggadusaid olis. Ii leat mihkkege mii dadjá ahte válgaboađus ii leat riekta.
Galgá čuovvuluvvot
Lea vuosttaš geardde ahte departemeanta čađaha stuorát guorahallama sámediggeválgga geavatlaš čađaheamis. Ulbmil lea loktet dieđuid suohkaniid vásáhusain sámediggeválgga čađaheamis, vai departemeanta sáhttá bargat ulbmillaččat sihkkarastin dihte ahte sámediggeválga čađahuvvo buoremus lági mielde.
Stáhtaráđđi dadjá čielgasit ahte raportta gávdnosat váldojuvvojit duođas ja galget čuovvuluvvot. Čuovvuleamis boahtá leat lagas ja buorre ovttasbargu Sámedikkiin dehálaš.
– Sámediggeválga galgá čađahuvvot rievttes ja luohttevaš vugiin. De fertet mii sihkkarastit ahte sámediggeválgga njuolggadusat ja rutiinnat leat buorit. Mii galgan dan dihte vuđolaččat geahččat raportta bohtosiid ja ávžžuhusaid, ja jođánit boahtit johtui heivvolaš čuovvulemiin ovttas Sámedikkiin, dadjá Gjelsvik.
Raportta lea Oslo Economics ráhkadan Gieldda- ja guovlludepartemeantta ovddas, ja lea ráhkaduvvon lassiguorahallama válgačađahanguorahallan 2021 vuođul. Raporta lea jorgaluvvon davvisámegillii, julevsámegillii ja lullisámegillii.