Stáhtabušeahtta 2024:
Eambbo oahppovirggit čoavdin dihte fástadoavtterkriisa
Ođas | Almmustahtton: 13.10.2023 | Dearvvašvuođa- ja fuolahusdepartemeanta
– Čoavdin dihte fástadoavtterkriisa dárbbašit mii eambbo doaktáriid geat spesialiserehit iežaset dábálašmedisiinnas. 66 ođđa virggi ásahemiin doaktáriid spesialiseremii, fállat mii eambbo virggiid go goassege ovdal, dadjá dearvvašvuođa- ja fuolahusministtar Ingvild Kjerkol.
Jagi 2024 stáhtabušeahtas árvala ráđđehus geavahit 33,3 miljovnna kruvnno virggiide doaktáriidda, geat čađahit vuosttaš oasi doavtterspesialiseremis (LIS1-virggit). Dat dahká 66 ođđa virggi, ja oktiibuot almmuhuvvojit 1 185 virggi 2024:s. Juolludeapmi nationála ALIS:i lassána 129, 5 miljovnnain kruvnnuin jagis 2024, mii mearkkaša ahte guovtti jagis lea dát nannejuvvon 329,5 miljovnna kruvnnuin.
– Dát lea alimus lohku goassege. Dat 66 ođđa virggi galget erenoamážit mannat dábálašmedisiinna viidáset spesialiseremii. Dát áŋgiruššan lea deaŧalaš dusten dihte rekrutterenhástalusaid fástadoavtterortnegis ja spesialistaváilli spesialistabálvalusas, dadjá dearvvašvuođa- ja fuolahusministtar Ingvild Kjerkol.
Ceavzilvuohta
Áŋgiruššan čuovvu dábálašdoaktáriid áššedovdi lávdegotti evttohusa, ja lea oassin ráđđehusa fástadoavtterortnega oppalaš nannema barggus.
– Máŋggaid jagiid lea leamaš fástadoavtterkriisa mas 220 000 norgalaččas ii leat leamaš fástadoavttir. Dát ráđđehus áigu jorgalahttit dán dili. Mii leat nannen dábálašdoavtterbálvalusa sullii miljárddain kruvnnuin 2023 ja 2024 bušeahttajagiin. Dát lea historjjálaš áŋgiruššan fástadoavtterortnega hárrái, dadjá dearvvašvuođa- ja fuolahusministtar.
– Min áŋgiruššan dagaha fástadoavtterortnega ceavzileabbon. Dat lea deaŧalaš goazahan dihte privatiserema ja dakkár ovdáneami, mas ovttaskas olbmuid ruhtadilli addá jođánet dahje buoret dearvvašvuođaveahki, lohká Kjerkol.
Čoavddalogut
- Ráđđehus árvala 33,3 miljovnna kruvnno LIS1-virggiide. Dat addá 66 ođđa virggi, ja oktiibuot 1185 virggi mat almmuhuvvojit 2024:s.
- Ráđđehus lasiha juolludusa pasieanttaide heivehuvvon vuođđodoarjagii 250 miljovnnain kruvnnuin jagis 2024, ja oktiibuot lea juolludus boahtte jahkái 730 miljovnna kruvnno. Lasiheami ulbmil lea buoridit fástadoavtterortnega beasatlašvuođa ja kapasitehta. Dat buorida maiddái fástadoaktáriid rekrutterema ja doalaheami, danne go rámmaeavttut buorránit.
- Ráđđehusas lea dáhttu láhčit fástadoavtterortnegii buoret rekrutterema buori, dávgasis ja oadjebas spesialistaoahpuin dábálašmedisiinnas. Danne lasihuvvo juolludus Nationála ALIS:i 129,5 miljovnnain kruvnnuin 2024:s, mii mearkkaša 329,5 miljovnna kruvnno lassáneami guovtti jagis.
- Ollu gielddaide lea váttis rekrutteret doavtterváktii doaktáriid. Fástadoaktáriid gearggusvuođanoađđi lea máŋgga sajis lossat. Dát guoská erenoamážit boaittobealguovlluide, ja čuohcá fástadoaktáriid rekrutteremii. Ráđđehus lasiha danne doarjaga boaittobealsuohkaniid doavtterfáktaortnegii 20 miljovnna ruvnnuin, 70 miljovnna ruvdnui 2024:s.