Aktiver Javascript i din nettleser for en bedre opplevelse på regjeringen.no

Nationálabušeahta 2019:

Vuoliduvvon opmodatvearru viesuide ja ástoáiggeopmodagaide

Ráđđehus evttoha geahpedit opmodatvearu bajimus máksomeari viesuin ja ásttoáiggeopmodagain 7 promillas 5 promillii jagi 2020 rájes. Ráđđehus evttoha maid ahte opmodagaid vearuhanvuođđu ii galgga leat eanet go 70 proseantta márkanárvvus.

– Mii háliidat ahte nu ollugat go vejolaš galget oažžut unnit opmodatvearu boahttevaš jagiid. Evttohuvvon rievdadusaiguin fertejit ollu suohkanat geahpedit opmodatvearu. Mii doaivut ahte viesso- ja bartaeaiggádat dan mearkkašit, dadjá ruhtadanministtar Siv Jensen (OvB).

Ráđđehus evttoha maid ahte suohkanat galget geatnegahttot geavahit SSB-árvobidjanvuogádaga go rehkenastet opmodatvearuhanvuođu viesuide.

– Dál mearridit suohkanat ieža geavahit go SSB-árvobidjanvuogádaga dahje iežaset báikkálaš meroštallanvuogádaga go rehkenastet opmodatvearu. Mii oaivvildat ahte buot suohkanat berrešit geavahišgoahtit seamma vuogi, go dalle meannuduvvojit viessoeaiggádat dássálaga beroškeahttá gos ásset, dadjá ruhtadanministtar Siv Jensen.

Ástoáiggeviesuide ii gávdno oktasaš árvobidjanvuogádat. Dál goit vuos meroštallojuvvo ástoáiggeviesuid árvu báikkálaččat.

Ráđđehus lea juo ráddjen man ollu opmodatvearu suohkanat sáhttet gáibidit ealáhusain ja ássiin. Opmodatvearru “rusttegiin ja buvttadandávviriin” heaittihuvvo 2019:s. Dan rájes sáhttet suohkanat mat gáibidit opmodatvearu, dušše gáibidit ovtta promilla vearuhanvuođus vuosttaš jagi. Dat lea beali unnit go dálá máksomearri. Suohkanat eai ge sáhte 2019 rájes lasihit máksomeari eanet go ovtta promilla jahkásaččat, dál dat lea guokte promilla.

Bajás