Eambbo ruhta mánáid ja nuoraid guovlulaš filbmadoaimmaide

Ráđđehus juolluda 2,8 miljovnna kruvnnu sturrosaš doarjaga Norgga kino- ja filbmafondii, mii galgá várrejuvvot mánáid ja nuoraid guovlulaš filbmadoaimmaide.

Dan geažil go DVD:t eai vuvdojuvvo šat nu olu, de leat Norgga kino- ja filbmafoandda (NKFF) sisaboađut njiedjan daid maŋimuš jagiid. Film & Kino, mii hálddaša foandaruđaid, lea de ferten unnidit doarjagiid arvat doaimmaide, nu maiddái mánáid ja nuoraid doaimmaide. Danne háliidat juolludit NKFF:ii doarjaga 2013:s sihkkarastit ahte mánáid ja nuoraid guovlulaš filbmadoaimmat joatkašuvvet miehtá riikka.

-Mun válddán Film & Kino ekonomalaš dili hui duođas, ja mii guorahallat molssaeavttuid movt ruhtadit Norgga kino- ja filbmafoandda, cealká kulturministtar Hadia Tajik.

-Mii leat oalle guhkás juo ollašuhttán ulbmiliid mat gusket buvttadeapmái, kvalitehta buorideapmái ja gehččiidlogulassáneapmái, ja dál lea dárbu geahčadit movt ovddasvástádus doaibmá  filbmagaskkusteami oktavuođas. Dan áigu departemeanta lagabui árvvoštallat, dadjá Tajik.

Mánáid ja nuoraid filbmadoaimmaid ovddasvástádus lea dál juogaduvvon NFI ja Film & Kino gaskka. Departemeanta áigu árvvoštallat galget go mánáid ja nuoraid filbmadoaimmat fievrriduvvot fas ruovttoluotta stáhtabušehttii jagi 2014 rájes.  Dát mielddisbuvttášii ahte unnit doaimmat ruhtaduvvojit Norgga kino- ja filbmafoandda bokte. Dát váikkuhivčče ahte Film & Kino sáhtašii  ruhtadit eará doaimmaid filbmasuorggis.