Gulaskuddan - Rámmaplána láhkaásahus Sámi allaskuvlla sámi vuođđoskuvlaoahpaheaddjeoahpuin

Lávdegoddi, mas ledje mielde sámi alit oahpu, skuvladoaimma ja ealáhusaid áirasat, nammaduvvui čakčamánu dán jagi, ja oaččui bargun ráhkadit rámmaplánaevttohusa ođđa sámi vuođđoskuvlaoahpaheaddjioahpu várás. Rámmaplánas addojuvvojit bajit dási mearrádusat dán oahpu várás. Departemeanta lea ožžon lávdegotti evttohusa ja sádde dán dál gulaskuddamii. Ođđa oahppu doaibmagoahtá 2010 čavčča rájes.

Stáhtus: se-NO Ferdigbehandlet

Gulaskuddanáigemearri: 08.02.2010

Lávdegoddi, mas ledje mielde sámi alit oahpu, skuvladoaimma ja ealáhusaid áirasat, nammaduvvui čakčamánu dán jagi, ja oaččui bargun ráhkadit rámmaplánaevttohusa ođđa sámi vuođđoskuvlaoahpaheaddjioahpu várás. Rámmaplánas addojuvvojit bajit dási mearrádusat dán oahpu várás. Departemeanta lea ožžon lávdegotti evttohusa ja sádde dán dál gulaskuddamii. Ođđa oahppu doaibmagoahtá 2010 čavčča rájes.
(10.12.2009)

-----------------------------------------------------------------------------------------

Dán ášši dokumeanttat (PDF-hámis):


Gulaskuddanreivve ja adreassalisttu (PDF)

Gulaskuddannotáhtta - Ođđa rámmaplána láhkaásahus Sámi allaskuvlla sámi vuođđoskuvlaoahpaheaddjeoahpuid 1.–7. dássái ja 5.–10. dássái (PDF)

Rámmaplána láhkaásahus Sámi allaskuvlla sámi vuođđoskuvlaoahpaheaddjeoahpuid 1.–7. dássái ja 5.–10. dássái (PDF)


Gulaskuddanreivve sáhttá maiddái lohkat HTML-hámis jus ohcá bajábealde fálus. (Gulaskuddannotáhta ja láhkaásahusevttohus leat goit dušše olámuttos PDF-hámis.) Geavahettiin fálu sáhtát maiddái lohkat gulaskuddancealkámušaid mat bohtet. Dáid almmuhuvvojit PDF-hámis dađe mielde go bohtet departementii.

Cealkámušat mat bohtet gulaskuddanáigemeari maŋŋá eai almmuhuvvo. Gulaskuddancealkámuša vejolaš almmuheapmi ii váikkut departemeantta árvvoštallamii.


Logan dihtii PDF-fiillaid, ferte leat installerejuvvon PDF-lohkki, omd. Adobe Reader. Prográmma lea nuvttá ja sáhttá vižžojuvvon dás: http://get.adobe.com/no/reader/

-----------------------------------------------------------------------------------------------------

Dát ášši lea meannuduvvon čuovvovaš bohtosiin:

Máhttodepartemeanta mearridii njukčamánu 1.b. 2010 Láhkaásahus sámi vuođđoskuvlaoahpaheaddjeoahpuid 1.–7. dási ja 5.–10. dási rámmaplánii. Láhkaásahusa gávnnat Lovdata vuolde. Geahča maid departemeantta johtočállosa F-05-10 eambbo dieđuid láhkaásahusa birra.

Loga dás láhkaásahusa davvisámegillii
 

Min čuj.: 200902348

GULASKUDDAN - Rámmaplána láhkaásahus Sámi allaskuvlla sámi vuođđoskuvlaoahpaheaddjeoahpuin



Stuoradiggi gieđahalai St.dieđáhusa nr. 11 (2008-2009) Læreren – rollen og utdanningen ja Innst. S. nr. 185, ja dan vuođul nammadii Máhttodepartemeanta čakčamánu dán jagi lávdegotti. Lávdegotti bargun lei ráhkadit sámi ođđa oahpaheaddjeohppui rámmaplánaevttohusa, mii galgá buhttet dálá sámi oahpaheaddjeoahpu 2010 čavčča rájes.

Jođiheaddji Vuokko Hirvonen (professor Sámi allaskuvllas)
Asta Balto (vuosttašamanuensa Sámi allaskuvllas)
Jan Idar Solbakken (allaskuvlalektor Sámi allaskuvllas)
Grete Bergstrøm (allaskuvlalektor Sámi allaskuvllas)
Terje Veimo (seniorráđđeaddi Høgskolen i Nord- Trøndelag)
Sonja Guttorm (rektor Sirpmá skuvllas, Deanu gielddas)
Reidar Erke (kultur- ja mánáidgárdeossodaga jođiheaddji, Guovdageainnu suohkanis)
Marit Helene Pedersen (guovlludirektevra NHO Finnmárku)
Sigrid Stångberg (Sámi parlamentáralaš ráđđi)

Dasa lassin áicin lea leamaš Heidi Salmi Sámedikki ovddasteaddjin. Åse Gunleiksrud ja Karin Helle leamašan Máhttodepartemeantta bealis áicin. Lávdegotti čállin leamaš Svein Lund, gean Sámi allaskuvla lea virgádan.

Ođđa vuođđoskuvlaoahpaheaddjeoahpu ulbmil lea integrerejuvvon, profešuvdnii ráhkkanahtti ja dutkanvuđđosaš oahpahus, mii geasuha, lea innovatiiva ja hástaleaddji ja mas lea alla kvalitehta. Oahppu galgá gokčat vuođđoskuvlla oahpaheaddjegelbbolašvuođadárbbuid ja hukset buori vuođu ovddidit gelbbolašvuođa oahpaheaddjebarggus. Dát gáibádusat biddjojit juohke oahpaheaddjeoahppoinstitušuvdnii miehtá riikka.

Lávdegotti mandáhtas daddjo earret eará ahte rámmaplána lea láhkaásahusa hámis ja galgá čilget vurdojuvvon oahppanjoksosiid. Dáid vuolggasadjin leat našunála kvalifikašuvdnarámmat ja oahpaheaddjekandidáhtaid gelbbolašvuođasuorggit, nu movt daddjo Stuoradiggedieđáhusas. Sámi rámmaplánalávdegoddi oaččui bargun árvvoštallat guokte váldovejolašvuođa:

-  Oktasaš láhkaásahus, masa biddjojit sierra mearrádusat ja vejolaš spiehkasteamit, mat gustojit sámi oahpaheaddjeohppui.
-  Sierra láhkaásahus sámi vuođđoskuvlaoahpaheaddjeohppui.

Lávdegoddi ávžžuha ráhkadit sierra láhkaásahusa sámi oahpaheaddjeohppui. Čujuhuvvo lávdegotti ákkastallamiidda, mat albmanit gulaskuddannotáhtas mii lea mielddusin.

Departemeanta sádde gulaskuddamii láhkaásahusevttohusa vuođđoskuvlaoahpaheaddjeohppui, man Sámi allaskuvlla lágida. Mielddusin leat láhkaásahusevttohus ja gulaskuddannotáhta. Gulaskuddannotáhtas leat lávdegotti evttohan mearrádusat, lávdegotti árvvoštallamat ja departemeantta árvvoštallamat. Sihke láhkaásahusevttohus ja gulaskuddannotáhtta atnet vuođđun Sámi rámmaplánalávdegotti evttohusa, mii lea sáddejuvvon departementii skábmamánu 2. beaivvi 2009. Departemeanta lea dattege gávnnahan sivaid rievdadit ja čielggasmahttit evttohusa, man sádde gulaskuddamii. Dáidda gullet rievdadusat earet eará:
 
• Láhkaásahusa doaibmaviidodat
• Oahpahusgiellagažaldat
• Geatnegahtton dárogiela 1. – 7. dásis
• Geatnegahtton sámegiela 5. – 10. dásis
• Friddjenmearrádusat

Rievdadusat bohtet ovdan láhkaásahusevttohusas, mii lea mielddusin ja ákkastallamat bohtet ovdan gulaskuddannotáhtas.

Gulaskuddannotáhta sisttisdoallá duššefal mearrádusaid, mat gullet erenoamážit sámi vuođđoskuvlaoahpaheaddjeohppui. Dat oasit mearrádusas mat leat seammaláganat go našunála láhkaásahusas, de čujuhuvvo dan gulaskuddannotáhtii.

Sámi rámmaplánalávdegotti bargun lea maiddái heivehit oktii barggu našunála oahpaheaddjeoahppoproseassain ovddidit našunála njuolggadusaid ja indikáhtoriid. Lávdegottit galget evttohit našunála njuolggadusaid ja indikáhtoriid ođđajagemánu 20. beaivái 2010.

Gulaskuddanáigemearri lea mánnodat guovvamánu 8.beaivi 2010. Gulaskuddancealkámušat sáddejuvvojit Máhttodepartemeantta epostii postmottak@kd.dep.no Gulaskuddamii ii addojuvvo maŋiduvvon cealkináigi ođđa vuođđoskuvlaoahpaheaddjeoahpu ovdáneami ja implementerema geažil.  


Dearvvuođaiguin

Toril Johansson
ekspedišuvdnahoavda
Karin Helle
seniorráđđeaddi