Vaššiságat

Vaššiságain sáhttet leat duođalaš váikkuhusat olbmuide, joavkkuide ja olles servodahkii. Almmolaš eiseválddiin ja oahppoásahusain lea erenoamáš ovddasvástádus bargat aktiivvalaččat ovddalgihtii eastademiin ja čuovvulit olbmuid, geaidda vaššiságat čuhcet.

Cealkinfriddjavuođas lea ereliiggán árvu. Das lea nana sajádat Norggas. Eat sáhte dattetge dohkkehit ságaid, mat ovdanbuktet vaši eará olbmuide. Mii leat fuolas go nu ollu vaššiságat gullojit sohkabeali, čeardda, oskku dahje eallinoainnu, hedjonan doaibmanávccaid dahje seksuála soju, sohkabealleidentiteahta ja dan ovdanbuktima vuođul.

2016 ráhkaduvvui strategiija vaššiságaid vuostá. Strategiija ulbmilin lea ahte fáttás ságastallojuvvo almmolašvuođas buriin vugiin, ja ahte eastadit ja vuosttildit vaššiságaid. Strategiijas evttohit dáid surggiide gullevaš doaimmaid: Deaivvadansajit, mánát ja nuorat, riektevuogádat, bargoeallin, mediasuorgi ja máhttu ja dutkan.

Mánáid-, nuoraid- ja bearašdirektoráhtas lea ovddasvástádus čuovvolit ollu Kulturdepartemeantta doaimmaid vaššiságaid vuostá, mat leat mielde strategiijas.

Kulturdepartemeanta (ja ovdal Mánáid- ja dásseárvodepartemeanta) leat 2014 rájes dorjon kampánnja Bisset vaššiságaid. Kampánnja ovddasteaddjit leat nuorat miehtá Norgga, geat leat mielde lágideamen doaimmaid nuoraide.