Stáhtabušeahtta 2023
Govttoleappot doarjja oktofuolaheddjiide
Preassadieđáhus | Nr: 53/2022 | Almmustahtton: 06.10.2022 | Ruhtadandepartemeanta
Ráđđehus háliida doarjaga lasihit oktofuolaheddjiide ja evttoha heaittihit sierrageasusortnega ja dan sadjái lasihit mánáidoaju. Mánáidoadju evttohuvvo lasihuvvot 964 ruvnnuin mánnui. Dat sihkkarasttášii maid ahte oktofuolaheaddjit geat ásset doaibmaguovllus Davvi-Romssa ja Finnmárkkus ožžot doarjaga seamma eavttuid vuođul go oktofuolaheaddjit muđui riikkas.
– Mánáidoaju lassáneapmi sihkkarastá ahte oktofuolaheaddjit ožžot doarjaga beroškeahttá dienasdásis ja geográfalaš ássanguovllus. Doarjja livčče dalle eanemus govttolaš. Buot oktofuolaheaddjit ožžot evttohusa mielde unnimusat seamma ollu doarjaga go jagi 2022, dadjá ruhtadanministtar Trygve Slagsvold Vedum (Gb).
Dál ožžot oktofuolaheaddjit mánáidoaju NAV:s ja vearrovuogádaga sierragessosa bokte. Ráđđehus evttoha heaittihit sierragessosa oktofuolaheddjiide ja dan sadjái lasihit mánáidoaju 1 054 ruvnnus 2 016 ruvdnui mánnui. Álkidahttin mielddisbuktá ahte dalle ii leat go okta láhka maid ferte čuovvut ja okta hálddašanorgána (NAV) geainna gulahallá.
Eanet mánáidoadju juolluduvvo beroškeahttá dienasdásis ja buot oktofuolaheaddjit ožžot seamma ollu doarjaga. Doarjja mii addojuvvo sierragessosa bokte juolluduvvo dušše oktofuolaheddjiide geain jahkásaš sisaboahtu lea eanet mearriduvvon dienasdási. Jagi 2020 ledje sullii 7 800 oktofuolaheaddji geain leai nu heajos dienas ahte eai ožžon ollislaš sierragessosa. Oktofuolaheaddjit geat heajos sisaboađu geažil eai olat ollislaš sierragessosa, ožžot ráđđehusa evttohusa mielde 11 500 ruvnno eanet jahkái. 2023:s lassána sisaboahtu eanemusat 9 600 ruvnnuin, danne go njuolggadusat eai rievdaduvvo ovdal njukčamánu 1.b.2023, hálddahuslaš sivaid geažil.
Oktofuolaheaddjit geat ásset doaibmaguovllus Davvi-Romssas ja Finnmárkkus ožžot uhcit sierragessosa go muđui riikkas. Sivvan dasa lea ahte dábálaš sisaboađu vearromáksomearri lea vuollelis go muđui riikkas (18,5 proseantta 22 proseantta ektui muđui riikkas). Oktofuolaheaddjit geat ásset Davvi-Romssas ja Finnmárkkus ja olahit ollislaš sierragessosa, ožžot rievdadusevttohusa mielde 1 800 ruvnnu eanet doarjaga jahkái (1 500 ruvnnu 2023:s).
Ráđđehusa evttohusain ožžot buot oktofuolaheaddjit unnimusat seamma ollu go 2022:s.