FORORD

Med handlingsplan for dei estetiske faga og kulturdimensjonen i skolen vil Kulturdepartementet og Kyrkje-, utdannings- og forskingsdeparte-mentet prøve å leggje tilhøva til rette for å styrkje samarbeidet mellom grunnskolen, nærmiljøet og kunst- og kulturinstitusjonane.

Det ligg store utfordringar i kulturinstitusjonane såvel som i skolen til å utvikle eksisterande og nye samarbeidsformer. Vidare er det viktig å setje i verk fellestiltak og formidlingsformer som kan aktivisere og stimulere barn og unge til eigen aktivitet og oppleving.

Skolen si rolle som kulturskapar og kulturformidlar er styrkt i dei læreplanane som no blir laga for skolen i framtida. I fylke og kommunar blir det drive ei rekkje kulturtiltak i og utanfor skolen. Ved å knyte dei ulike arenaene saman i eit forpliktande samarbeid, vil ein ha eit godt utgangspunkt for å skape eit meir heilskapleg oppvekstmiljø for barn og unge.

Vi ønskjer lykke til med det vidare arbeidet på lokalt nivå!

ÅSE KLEVELAND GUDMUND HERNES

statsrådstatsråd