Noreg og Sverige utvidar politisamarbeidet
Historisk arkiv
Publisert under: Regjeringen Solberg
Utgjevar: Justis- og beredskapsdepartementet
Pressemelding | Nr: 62 – 2018 | Dato: 04.09.2018
Politiets beredskapstropp og tilsvarande spesialeining i Sverige vil i framtida kunne bistå kvarandre operativt under terrorhendingar og andre krisesituasjonar.
Avtalen blei i dag signert i det svenske justisdepartementet. Erklæringa om sluttføring av forhandlingane blei signert av justis-, beredskaps- og innvandringsminister Tor Mikkel Wara (Frp) under Nordisk justisministermøte i Lund 1. juni 2018.
– Eg er glad for at vi no har sikra at det er mogleg med eit effektivt samarbeid mellom innsatseningane i krisesituasjonar, seier Tor Mikkel Wara.
Avtalen betyr at Noreg og Sverige kan anmode om bistand frå kvarandres nasjonale beredskapsressursar i situasjonar som terrorhendelsar, gisseltakingar, kapringar og liknande grov kriminalitet.
– Med eit utvida politisamarbeid i Norden forbetrar vi moglegheitene for å førebygge, forhindre og oppklare kriminalitet som skjer på tvers av landegrensene, seier justisministeren.