Arbeidarparti-regjeringa med revidert strategi for likestilling av personar med funksjonsnedsetting
Pressemelding | Dato: 28.09.2026 | Kultur- og likestillingsdepartementet
På det årlege rundebordmøtet med organisasjonar for menneske med nedsett funksjonsevne lanserte kultur- og likestillingsminister Lubna Jaffery den nye strategien til Arbeidarparti-regjeringa. Målet med strategien er å få fleire til å delta i arbeidsliv og på fritidsarenaer, forebygge diskriminering og å skape eit samfunn som er meir universelt utforma.
- – I Noreg skal alle ha like moglegheiter til å leve gode liv, uavhengig av funksjonsnedsetting. Dessverre ser vi i dag at mange med funksjonsnedsetting framleis blir utestengde og diskriminerte på fleire samfunnsområde. For Arbeidarparti-regjeringa er det derfor viktig å fortsette kampen for eit samfunn for alle, seier kultur- og likestillingsminister Lubna Jaffery (Ap).
Strategien er laga i dialog med organisasjonar på feltet og følger opp fleire av anbefalingane til Likestillings- og mangfaldsutvalet. Utfordringane som personar med funksjonsnedsetting opplever knyt seg til fleire fagfelt og dekker heile breidda.
- Personar med funksjonsnedsetting opplever fordommar, hets og diskriminering.
- Samfunnet ser i stor grad på funksjonsnedsetting som eit helseproblem, ikkje eit spørsmål om rettar.
- Samfunnet er ikkje universelt utforma.
- Deltakinga i arbeidslivet blant personar med funksjonsnedsetting er for låg.
Eit av innsatsområda i strategien er tryggleik og fridom frå diskriminering. Regjeringa vil styrke organisasjonane i arbeidet mot fordommar, og det skal bli gjennomført ei undersøking av haldningane til personar med funksjonsnedsetting, slik at vi kan få meir kunnskap om kor vi skal auke innsatsen på dette feltet.
– Det er heilt uakseptabelt at menneske blir utsette for fordommar, stereotypiar og hets på grunn av si funksjonsnedsetting. Eit samfunn fri for hets og fordommar krev eit felles ansvar, og eit arbeid som må gjerast i skulen, på fritidsarenaene, på arbeidsplassen, i sosiale medium og rundt middagsbordet heime, seier Jaffery.
Dei tre andre innsatsområda er «demokrati og likestilt deltaking», «eit godt verkemiddelapparat» og «eit universelt utforma samfunn». Strategien vidarefører fleire innsatsar frå handlingsplan for universell utforming og handlingsplan for likestilling av personar med funksjonsnedsetting.