Regjeringas forslag til omprioriteringar i kulturbudsjettet

Frivilligsentralar

– Vi ønsker òg å legge til rette for at det blir oppretta fleire frivilligsentralar. Frivilligsentralane skapar aktivitet og viktige fellesskap for, og med, folk i heile landet. Dei legg òg til rette for gode samarbeid mellom kommunar og frivillige organisasjonar, seier kultur- og likestillingsministeren.

Regjeringa foreslår å auke bevillinga til frivilligsentralar med 23,2 millionar kroner. Den totale bevillinga i 2023 blir no 244,4 millionar kroner.

Momskompensasjon ved bygging av idrettsanlegg

– Idrettsanlegg gir grunnlag for breie og inkluderande aktivitetstilbod i heile landet, og dei skaper gode lokalsamfunn. Derfor er det avgjerande å sikre gode og føreseielege rammevilkår for dei idrettslaga som bygger anlegg, seier Trettebergstuen.

Regjeringa foreslår ei tilleggsbevilling på totalt 70,8 millionar kroner til momskompensasjon ved bygging av idrettsanlegg. Bevillinga skal sikre full kompensasjon for alle godkjende søkarar i 2023.

Nationaltheatret

– Vi skal finne ei løysing som bevarer Nationaltheatret for framtida. I mellomtida må vi sikre bygget slik at Nationaltheatret kan vere i trygg drift fram til teaterbygningen rehabiliterast. Dette er avgjerande for at teateret kan halde opent for publikum og tilsette, seier statsråden.

Regjeringa foreslår å auke bevillinga til Statsbygg for sikring av teaterbygningen med 20 millionar kroner i 2023.

Norsk Skogfinsk Museum

– Kulturen og historia for våre minoritetar er viktig for vår nasjonale historie. Vi utvidar derfor ramma til det nye formidlingsbygget til Norsk Skogfinsk Museum, seier Trettebergstuen.

Regjeringa foreslår å auke ramma til Norsk Skogfinsk Museum sitt nybygg på Svullrya med 20 millionar kroner, samt eit tilskot på 2 millionar kroner til å forberede innflytting i det nye bygget. Dette vil gjere det mogleg å realisere prosjektet til tross for den ekstraordinære prisstigninga som har vore etter at museet fekk tilsegn om stønad i statsbudsjettet for 2021.

• For full oversikt over Kultur- og likestillingsdepartementets forslag til omprioriteringer i revidert nasjonalbudsjett, se kapittel 2.3 i Prop. 118 S (2022–2023)

Tilleggsbevilgninger og omprioriteringer i statsbudsjettet 2023