Mindre unødvendig emballasje, meir ombruk

Dette blir nokon av konsekvensane når nye reglar for emballasje trer i kraft.

– Ei viktig løysing på klima- og naturkrisa er at vi tar betre vare på ressursane vi hentar ut av naturen. Vi må bruke ressursane fleire gongar framfor å kaste og bruke nytt. Meir ombruk av emballasje er eit viktig steg på vegen, seier klima- og miljøminister Tore O. Sandvik.

Europaparlamentet vedtok denne uka den såkalla emballasjeforordninga som skal gi felles reglar for bruk av emballasje i Europa. Formålet er å redusere bruken av emballasje, oppnå meir ombruk og materialgjenvinning, få mindre avfall og mindre bruk av helse- og miljøskadelege stoff i emballasjen.

– Bruk av unødvendig emballasje krev eit høgt forbruk av ressursar, og gir mykje avfall. Vi skal framleis bruke emballasje når det er nødvendig, men vi skal bruke mindre av han. Vi skal bruke meir om igjen og skal auke materialgjenvinning, seier klima- og miljøminister Tore O. Sandvik.

Med dei nye reglane skal emballasjen formast slik at han kan materialgjenvinnast. Det vil bli stilt krav om at ein viss del av emballasjen skal kunne brukast om igjen, for eksempel flaskar som kan fyllast opp på nytt eller ombruksløysingar for transportemballasje. Emballasjen skal lagast slik at vekt og volum reduserast til eit minimum. Konsekvensen kan bli at pakka du har bestilt på nettet ikkje lenger skal innehalde masse luft og unødig emballasjebruk. Det skal bli forbode å bruke eingongsplast rundt til dømes ølboksar og brusflasker for å få deg til å kjøpe fleire samtidig. Det skal ikkje vere lov å bruke eingongsplast rundt frukt og grønsaker i pakker som veg mindre enn 1,5 kg, med mindre det er viktig for matsikkerheit eller for å redusere matsvinn.

Emballasjeforordninga endrar eit EU-regelverk som er gjennomført i norsk regelverk, og miljøstyresmaktene ser no på korleis regelverket best kan gjennomførast i Noreg.