Endringar i forskrift om midlar til investering og bedriftsutvikling i landbruket

Landbruks- og matdepartementet har fastsett endringar i forskrift om midlar til investering og bedriftsutvikling i landbruket. Endringane vil gjelde frå 3. februar 2025. Endringane følgjer opp endringar bestemt i jordbruksoppgjeret 2024 i tillegg til ein gjennomgang av regelverket elles med mål om forenkling og tydeleggjering av regelverket for forvaltninga og for søkjar av tilskotsmidlar.

Samstundes med fastsetting av endringar i denne forskrifta blei forskrift 16. desember 2002 nr. 1610 for garanti ved åpning av gjeldsforhandlinger i henhold til konkurs oppheva.

Departementet sitt forslag til endringar var på høyring hausten 2024. Det kom i overkant av 50 høyringsinnspel på endringsforslaga. Høyringsnotat og høyringsinnspel kan lesast her

Nærmare om endringane som er fastsette

Endringane i forskrifta som følgjer opp jordbruksoppgjeret 2024 omfattar å gå over til lik praksis for støtteutmåling for mindre tilskot over ordninga med tilsvarande ordningar i Innovasjon Norge elles, avvikling av ekstra tilskot til tre som byggemateriale, lik støtteutmåling for menn og kvinner ved tilskot til generasjonsskifte, og forenklingar i bestemmingane om tilskot til investeringar i gjødsellager med vidare.

Vidare omfattar endringa forenkling i bestemminga om igangsetting av eit prosjekt, der bestemminga blir harmonisert med praksis i Innovasjon Norge elles. Bestemmingane om kommunane si rolle i tilknyting til forvaltning av IBU-ordninga er blitt justert, men ikkje tatt bort i sin heilskap, slik departementet sitt høyringsforslag la opp til. Den særskilde klagenemnda på IBU-midlane er oppheva og blir erstatta med særskilde sakshandsamingsreglar for handtering av klager i forskrifta. Endringane omfattar vidare fleire mindre justeringar i forskrifta som følgje av behov for å oppdatere enkelte bestemmingar, utan at det medfører materielle endringar.

Du kan lese meir om endringane her: