Helse- og omsorgsministeren presenterte rettleiings- og godkjenningsordning for helseteknologi

I den samanhengen inviterte Vestre til eit dialogmøte med leverandørar av elektroniske pasientjournalsystem og helseteknologibedrifter i regjeringskvartalet for å orientere om ordninga og lytte til behova til sektoren.

Konstituert helsedirektør Mariann Hornnes heldt ei innleiing om rettleiings- og godkjenningsordninga, og seniorrådgjevar Per Ludvig Skjerven i Helsedirektoratet fortalte vidare om innhaldet og viste fram ein demonstrasjon.

Forordninga om det europeiske helsedataområdet (EHDS) var også tema. Denne blei vedtatt i EU tidlegare i år, og er EØS-relevant. EHDS skal sikre at vi får trygg og effektiv bruk av helsedata i Europa. EHDS gir store moglegheiter for norsk helsenæring. Samtidig gjeld det å følge med i timen for å kunne ha produkt som er i samsvar med krava, og produkt som blir etterspurt i eit nasjonalt og europeisk marknad.

Rettleiings- og godkjenningsordninga vil gi ei oversikt over løysingar som tilfredsstiller krav til aktuelle standardar, digital tryggleik og personvern.

Strøyming

Arrangementet blei filma av Digitaliseringsorganisasjonen til departementa (DIO) og ein kunne følge sendinga direkte på denne sida. Her kan ein også laste ned videofila i etterkant. DIO distribuerte publiseringspunkt til media som ville sende arrangementet direkte. DIO kan kontaktast på telefon 22 24 88 45 eller e-post dio-lydogbilde@dio.dep.no.

Presse som ønsker å bygge inn nett-tv-sendinga på sine nettsider finn embed-kode ved å trykke «Del video»-knappen i videospelaren på sida.