– Regjeringa jobbar for å gi alle høve til å få dei barna dei ønskjer seg. Vi har gjort foreldrepengeordninga meir fleksibel så færre foreldre får behov for å ta ulønt permisjon. Resultatet viser at dette var ei endring som mange foreldre ønskte, seier barne- og familieminister Lene Vågslid.  

Frå 1. juli 2024 fekk foreldre som vel 80 prosent foreldrepengar 11 dagar lengre permisjon. Endringa gjer at verdien av ordninga i praksis blir lik 100 prosent lønnsdekning.

– Arbeidarpartiregjeringa ønskjer ein familiepolitikk som gjer det mogleg å vere gode foreldre og engasjerte arbeidstakarar. Forskjellen som var på dei to permisjonsordningane gjorde at mange tok ulønt permisjon og risikerte å miste viktige rettar som arbeidstakarar, seier Vågslid.

I første halvår 2026 valde 48 prosent av foreldra 80 prosent dekningsgrad, opp frå 38 prosent i same periode i 2025.

NAV oppgir at 9,4 prosent fleire fekk foreldrepengar i første halvår i 2026 samanlikna med 2025, og 14,6 prosent samanlikna med 2017. Auken sidan 2017 kjem i hovudsak av at fleire fedrar enn før får foreldrepengar.

– Arbeidarpartiregjeringa jobbar for tryggleik for familieøkonomien. I dag har vi historisk låg makspris i barnehagen, gratis kjernetid i SFO og nesten dobbelt så høg barnetrygd for dei eldste barna. At også fleire fedrar nyttar seg av rettane sine som foreldre er eg veldig glad for, seier Vågslid.