Stort utval, tilgang til nisjeprodukt og reservedelar og moglegheita til å finne mange ulike varer på same stad er også viktige grunnar.Rapporten er utarbeidd av Forbruksforskningsinstituttet SIFO på oppdrag frå Barne- og familiedepartementet.

– Den kraftige veksten i netthandelen frå lågprisplattformer skaper nye utfordringar for forbrukarvernet. Skal vi finne gode tiltak, må vi forstå kvifor forbrukarane vel desse plattformene. Denne rapporten gir oss viktig kunnskap som vi tek med oss i det vidare arbeidet, seier barne- og familieminister Lene Vågslid.

SIFO har undersøkt handlemønstra til norske forbrukarar på lågprisplattformer utanfor EØS. Undersøkinga ser mellom anna på kva som får forbrukarane til å handle der, og kor medvitne dei er om risikoen som kan vere knytt til slike kjøp.

Rapporten gir eit meir detaljert bilete av kva som motiverer norske forbrukarar til å handle frå lågprisplattformer utanfor EØS. Kunnskapen skal styrkje grunnlaget for regjeringa sitt vidare arbeid med å fremje trygg og informert netthandel.

– Som forbrukarminister er eg oppteken av at folk skal kunne stole på at varene dei kjøper, er trygge, og at rettane deira blir varetekne. Det bør gjelde anten du handlar i ein fysisk butikk eller på nett, seier Vågslid.

Vil vurdere informasjonstiltak

I EØS er det eit omfattande regelverk som skal sikre eit sterkt forbrukarvern. Diverre blir ikkje desse rettskrava alltid overhaldne. Det er viktig at forbrukarane har kunnskap om risikoane dei kan møte når dei handlar frå netthandelsplattformer utanfor EØS.

– Forbrukarane må ha god kunnskap om rettane sine, slik at dei kan ta medvitne val. Eg ønskjer å sjå nærare på kva tiltak vi kan setje i verk for å gi forbrukarane betre informasjon, seier Vågslid.

Regjeringa arbeider også med regelverksendringar som skal bidra til tryggare produkt og eit sterkare forbrukarvern. Det gjeld mellom anna gjennomføringa av produktsikkerheitsforordninga, marknadstilsynsforordninga og økodesignforordninga i norsk rett, i tillegg til forordninga om digitale tenester (DSA).

Barne- og familiedepartementet har også oppretta ei nasjonal innsatsgruppe for netthandel. Gruppa skal bidra til betre samarbeid og koordinering mellom relevante styresmakter. Den nye SIFO-rapporten blir ein del av kunnskapsgrunnlaget for dette arbeidet.