Váldonjuolggadusa mielde lea gielddus vuodjit almmolaš geainnu alde muohtaskuhteriin, dahje nugohčoduvvon boagánmohtorsihkkeliin.

Muohtaskuhtervuodjimii meahcis galgá leaktorádjin leat 70 kilomehtera diimmus.

Leaktorádjin meahccevuodjimii oktan reagain mas ii leat mátkkálaš mielde, galgá leat 60 kilomehtera diimmus. Reagain vuodjimii, mas lea mátkkálaš mielde, lea leaktorádjin 40 kilomehtera diimmus.

Buohkat geat vudjet muohtaskuhteriin galget váldonjuolggadusa mielde geavahit dohkkehuvvon suodjegahpira.

Dát leat muhtun deaŧaleamos njuolggadusat láhkaásahusain mat gustojit vuodjimii muohtaskuheriin dahje boagánmohtorsihkkeliin. Nuppástusat mearriduvvojedje juovlamánus diibmá ja galget biddjojuvvot fápmui suoidnemánu 1. dán jagi.

Ođđa njuolggadusaid mielde sáhttá báikkálaš geaidnokantuvra, dihto dáhpáhusain ja dihto eavttuiguin, spiehkastit váldonjuolggadusas mii gieldá vuodjimis muohtaskuhteriin almmolaš geainnu alde. Sáhttet muđui dahkkojuvvot spiehkastagat politiija- ja ambulánsavuodjimii ja eará heahteveahkkebálvalussii ja earret eará vuodjimii mii lea dárbbašlaš oassi boazodoalus, šibitdoalus dahje vuovdedoalus.

Daid dáhpáhusain main ii leat gielddus vuodjit muohtaskuhteriin almmolaš geainnu alde, galgá leaktorádji dakkár vuodjimii leat 30 kilomehtera diimmus.

Suodjegahpira geavaheapmi lea ásahuvvon

Ođđa ásahus suodjegahpira geavaheami birra muohtaskuhteriin vuojedettiin lea geavatlaččat ovtta lágan dainna suodjegahpirásahusain mii gusto mohtorsihkkel- ja mopedavuodjimii.

Muohtaskuhtervuodjimii mii gullá boazodollui dahje vuovdedollui, ii guoskka ođđa ásahus suodjegahpira geavaheami birra.

Ii leat šat vejolaš dahkat spiehkastagaid suodjegahpirásahusas doaktára julggaštusa vuođul. Dát nuppástus guoská mohtorsihkkel-, mopeda- ja muohtaskuhtervuodjimii.

Dieđihandoaibmabijut

Johtolatdepartemeanta lea ovdalis dán jagi, ovttasbarggus Politiijain ja Stáhta geaidnodoaibmahagain, čađahan doaibmabijuid mat galget dahkat ođđa njuolggadusaid dovddusin. Dát bargu galgá jotkojuvvot ja nannejuvvot dás dálvvi vuostá.

Doaimmahussii

Preassadieđáhus gávdno maiddái dárogillii.

Pressemeldingen ligg òg føre på norsk

Juos dáhtut eambbo dieđuid – geahča:

”Forskrift om forbud mot bruk av beltemotorsykkel (snøscooter) på offentlig veg”, fastsett ved kongeleg resolusjon av 14. desember 2001. (”Láhkaásahus gildosa birra boagánmohtorsihkkela (muohtaskuhtera) geavaheami vuostá almmolaš geainnu alde”, mearriduvvon gonagaslaš resolušuvnna bokte juovlamánu 14. 2001.)

”Forskrift om kjøring med motorvogn i terrenget og på veg ikke åpen for alminnelig ferdsel”, fastsett ved kongeleg resolusjon av 14. desember 2001. (”Láhkaásahus vuodjima birra mohtorvovnnain meahcis ja geainnus mii ii leat rabas dábálaš johtolahkii”, mearriduvvon gonagaslaš resolušuvnna bokte juovlamánu 14. 2001.)

”Forskrift om endring i forskrift 21. mars 1986 nr. 747 om kjørende og gående trafikk (trafikkregler)”, fastsett ved kongeleg resolusjon av 14. desember 2001. (”Láhkaásahus nuppástuhttit láhkaásahusa njukčamánu 21. 1986 nr. 747 vuoji ja vácci johtalusa birra (johtalusnjuolggadusat)” mearriduvvon gonagaslaš resolušuvnna bokte juovlamánu 14. 2001.)

”Forskrift om endring i forskrift 21. september 1979 nr. 7 om bruk av personlig verneutstyr under kjøring med motorvogn”, fastsett av Samferdselsdepartementet 19. desember 2001. (”Láhkaásahus nuppástuhttit láhkaásahusa čakčamánu 21. 1979 nr. 7 persovnnalaš suodjebiergasiid geavaheami birra vuojedettiin mohtorvovnnain”, mearriduvvon Johtolatdepartemeanttas juovlamánu 19. 2001.)