Historisk arkiv

1 million kroner ”PROPARK – produktutvikling i park” på Finnskogen

Historisk arkiv

Publisert under: Regjeringen Stoltenberg II

Utgjevar: Kommunal- og regionaldepartementet

Lokale og regionale parkar over heile landet får no midlar frå Kommunal- og regionaldepartementet til å satse på bærekraftig bruk av natur- og kulturverdiar i lokal bygdeutvikling. - Me har fått inn mange gode søknadar, og ”PROPARK – produktutvikling i park” er eit av prosjekta som får støtte, seier kommunal- og regionalminister Liv Signe Navarsete.

Lokale og regionale parkar over heile landet får no midlar frå Kommunal- og regionaldepartementet til å satse på bærekraftig bruk av natur- og kulturverdiar i lokal bygdeutvikling. - Me har fått inn mange gode søknadar, og ”PROPARK – produktutvikling i park” er eit av prosjekta som får støtte, seier kommunal- og regionalminister Liv Signe Navarsete.

Verdiskapingsprogrammet for lokale og regionale parkar skal bidra til å fremje levande bygdesamfunn gjennom heilskapleg stad- og næringsutvikling i område med særskilde natur- og kulturverdiar.

Landskapet, som strekk seg frå Austmark til Trysil kommune nord i Hedmark fylke, blir kalla Finnskogen.  Arealet som Finnskogen dekkjer går over seks norske grensekommunar og strekkjer seg over riksgrensa til Sverige. Finnskogen Natur - & Kulturpark er under etablering, og ein tek sikte på å få den etablert i mars 2013.

Hovudmålsettinga for etableringa er å forsterke det langsiktige og grenselause samarbeidet omkring regionen sitt særpreg og ressursar mellom alle interesserte deltakarar lokalt og regionalt.

Verdiskapningsprosjektet PROPARK - produktutvikling i park, vil vere ein del av parketableringa og byggje på den same hovudmålsettinga, men ha tydelegare fokus på verdiskapning og produktutvikling. Prosjektet vil difor spissast mot grenseoverskridande samarbeid om utviklinga av lokale produkt og pakking av opplevingar på Finnskogen, med grunnlag i regionen sitt særpreg - kultur og kulturminner og skogen sin natur, miljø og sosiale verdiar.

- Prosjektet strekk seg over eit stort område som fortener meir merksemd. Eg trur dette prosjektet kan bidra til å sette Finnskogen på kartet, og eg gler meg til å følgje kva de oppnår, seier kommunal- og regionalminister Liv Signe Navarsete.

 - Me ynskjer at verdiskapingsprogrammet skal ha overføringsverdi for fleire, og legg også vekt på kommunikasjon og erfaringsutveksling. Dette gjeld både mellom parkar som er godt etablerte, men også for parkar som er under etablering. Me ynskjer at dei parkane som no får støtte, kan utvikle seg til å bli ei kjelde til inspirasjon og kunnskap for andre som er interessert i park som modell for bygdeutvikling, seier Navarsete.


Kommunal- og regionaldepartementet sin pressetelefon: 22 24 25 00.