– Regjeringa vil sikre at lokalsamfunn får sin del av inntektene frå vindkrafta. Derfor har me innført ei avgift på vindkraft som blir fordelt til vertskommunane. Ordninga skal gi vertskommunane stabile og føreseielege inntekter frå vindkraftverk som er lokaliserte i kommunen. Det er viktig at kommunar som bidrar til nødvendig kraftproduksjon i Noreg, også får inntekter tilbake, seier energiminister Terje Aasland.

I fjor betalte vindkraftprodusentane inn 331,8 millionar kroner i avgift på vindkraft. Desse midlane vil no bli overførte til vertskommunane.

Løyvinga i 2026 er om lag på same nivå som løyvinga i 2025, som var på 332,9 millionar kroner. Beløpet er redusert med 28,2 millionar kroner samanlikna med saldert budsjett for 2026.

Bakgrunnen er at løyvinga i saldert budsjett vart berekna på grunnlag av normalårsproduksjon, medan den faktiske vindkraftproduksjonen i 2025 viste seg å vere lågare. Dette blir no justert i det reviderte budsjettet.

Midlane skal fordelast mellom vertskommunane i tråd med ein fordelingsnøkkel utarbeidd av Noregs vassdrags- og energidirektorat (NVE). Kor mykje kvar enkelt kommune får utbetalt, blir klart til hausten.

Om ordninga

Produksjonsavgifta på vindkraft vart innført 1. juli 2022. Formålet er å gi inntekter til vertskommunane.

Skatteetaten krev inn avgifta frå konsesjonærane. Året etter blir inntektene frå avgifta fordelte til vertskommunane. Beløpet som blir fordelt, blir justert i samband med revidert budsjett, på grunnlag av faktisk innbetalt avgift for siste budsjettår.