374 millionar kroner til banebrytande forskarar

– For å sikre norsk tryggleik, konkurransekraft og velferd må vi utvikle og ta i bruk ny kunnskap. Forskinga som no får støtte, flyttar grensene for kva vi veit og er med på å bygge verdsleiande forskingsmiljø i Noreg. Slik rustar vi samfunnet for både dagens og morgondagens utfordringar, seier forskings- og høgare utdanningsminister Sigrun Aasland (Ap).

Skal dyrke fram dristige forskingsidear og verdsleiande miljø

Dei 374 millionane er fordelte på tre utlysingar med ulike føremål. Det er første gong det blir delt ut midlar til toppforskarar og radikale forskingsidéar gjennom desse ordningane. Føremålet er å styrke innsatsen på den dristige forskinga basert på forskarane si eiga faglege nysgjerrigheit. Alle fagområde kunne søke

Slik er fordelinga:

• 160 millionar kroner går til fire toppforskar-prosjekt med mål om å utvikle verdsleiande forskingsmiljø. Kvart prosjekt får 40 millionar kroner og føreset samarbeid mellom to eller fleire leiande forskarar.
• 16 millionar kroner går til åtte spesielt dristige forskingsidéar gjennomførte av forskarar tidleg i karrieren. Kvart prosjekt får inntil 2 millionar kroner.
• 198 millionar kroner går til banebrytande forsking av høg kvalitet gjennom ordninga FRIPRO. Til saman 19 prosjekt blir finansierte med 6–12 millionar kroner kvar.

– Den nysgjerrigheitsdrivne og dristige forskinga er heilt sentral for å bygge sterke forskingsmiljø i Noreg og knyte norske forskarar til den internasjonale forskingsfronten. Ved å prioritere kvalitet og dristige forskingsidéar, styrker vi evna til å omstille og vidareutvikle samfunnet, seier administrerande direktør i Forskingsrådet, Mari Sundli Tveit.

Her er nokre av prosjekta som får pengar

Prosjekta er fagleg varierte og handlar om alt frå Alzheimer og kreft til skatt og maktkamp i arbeidslivet. Sjå komplett liste over prosjekta lenger ned i saka.

Kan vi føreseie Alzheimer før symptoma oppstår?

Alzheimers sjukdom er ei av vår tids største helseutfordringar. Sjukdomen startar lenge før symptoma dukkar opp, ofte fleire tiår tidlegare. Forskarar ved Universitetet i Oslo får 40 millionar kroner for å gå «tilbake i tid» og analysere blodprøver frå folk i 40- og 50-åra for å finne arvelege stoffskiftemarkørar som kan varsle risiko. Ved å kombinere slike tidlege spor med hjerneskanning, genetikk og maskinlæring, utviklar forskarane ein personleg «Alzheimers-avatar» som kan føreseie når sjukdomen kan oppstå for kvart individ. Dette kan opne døra for førebyggande behandling – og kanskje utsetje eller hindre sjukdomsstart for framtidige generasjonar.

Korleis formar skattesystemet liva våre?

Skatt påverkar korleis vi jobbar, investerer og fordeler verdiar i samfunnet. Forskarar ved NMBU får 40 millionar kroner til å finne ut korleis skatteunndraging skjer, kva det betyr for økonomien, og korleis vi kan lage smartare og meir rettferdige reglar. Prosjektet kombinerer stordata, juridisk ekspertise og feltforsøk i verkelege situasjonar. Målet er å avsløre triksa som kostar milliardar, og gi styresmaktene verktøy for betre handheving og enklare reglar. Prosjektet skal bygge eit nytt senter for skatterett og rekruttere unge forskarar, slik at kunnskapen varer. Slik vil forskarane endre korleis vi tenker om skatt – for eit meir rettferdig og effektivt system.

Betre prøverøyrsbehandling

Éin av seks opplever problem med å få barn. Prøverøyrsbehandling hjelper mange, men mislykkast framleis ofte. Ein ung forskar ved Universitetet i Oslo får no 10 millionar kroner for å undersøke om eit molekyl som finst naturleg i alle levande celler, NAD+, kan bidra til meir skånsame og effektive prøverøyrsbehandlingar. Nyare forsking viser at molekylet ikkje berre styrer cellene sin energi, men òg spelar ei rolle i RNA-regulering. Ved å studere korleis NAD+ koplar seg på RNA og påverkar utviklinga av embryo, håpar forskarane å betre embryoets kvalitet og auke sjansen for vellukka graviditetar.

Maktkamp i arbeidslivet – meir enn løn og jobb

Forholdet mellom arbeidsgivar og arbeidstakar handlar ikkje berre om løn og stillingar. Det har betyding for helse, tryggleik og til og med kriminalitetsnivået i samfunnet. Når arbeidsgivarar får for mykje makt, kan det gi dårlegare arbeidsvilkår, svekt psykisk og fysisk helse og auka risiko for sosial uro.

Forskarar ved Norges handelshøyskole får 12 millionar kroner til å utvikle eit nytt rammeverk som viser korleis maktbalansen i arbeidsmarknaden påverkar alt frå organisasjonskultur til ulikskap – og korleis smartare politikk kan bygge eit meir robust samfunn. Med unike norske data og banebrytande metodar gir forskarane innsikt som kan endre både forskinga og politikken.

Smarte immunceller mot kreft

Kreftimmunterapi verkar ofte dårleg mot solide svulstar, fordi svulstmiljøet sender «bremsesignal» som skrur av immuncellene. No får ein forskar tidleg i karrieren ved Oslo universitetssjukehus 2 millionar kroner for å utvikle «smarte» immunceller som kan finne fram til eit bestemt vev, kjenne att faresignal lokalt og deretter omprogrammere naboceller slik at immunsystemet blir aktivert igjen.

Oversikt over alle prosjekta som får støtte

Institusjon	Prosjektleiar	Prosjekttittel	Sum (1000 kr)
Toppforskere
NTNU	Moe Skjølsvold, Tomas	Feasibility: The socio-political & techno-economic craft of enabling twin transitions	40000
UNIVERSITETET I OSLO	Djurovic, Srdjan	Multimodal metabolic markers for mechanisms and predictive trajectories of Alzheimer's disease	40000
NORGES MILJØ- OG BIOVITENSKAPELIGE UNIVERSITET (NMBU)	Alstadsæter, Annette	Building new foundations for Public Economics and Law	40000
UNIVERSITETET I BERGEN	Ytre-Hauge, Kristian	BioPrecise Protons: Advancing physical and biological precision to enhance efficacy and reduce toxicity in proton therapy	40000
Radikale forskningsidéer i tidlig karriere
UNIVERSITETET I OSLO	Raud, Liisa	From Sleep to Steps: Linking Sleep and Motor Control in Infant Development	2000
NTNU	Haugland, Johanne	Into the wild: A geometric model for almost gentle algebras	2000
NORCE RESEARCH AS	Mayers, Kyle	REPUTATION: Reconstruction of past virus and phytoplankton interactions using sedimentary ancient DNA	2000
NTNU	Gao, Chao	A bioinspired strategy for energy dissipation via controlled random topologies	2000
OSLO UNIVERSITETSSYKEHUS HF	Torralba-Raga, Lamberto	ECHO: Epigenetic Cellular Hack for Oncotherapy - Engineering CAR-NK Cells to Reprogram Tumor Macrophages via Targeted dCas9 Exosomes	2000
UNIVERSITETET I OSLO	Reis, Paula	SCAL3D - Exploring Scaling Laws for Drainage in 3D Porous Media	2000
NTNU	Genovese, Guglielmo	Measuring glutamate distribution in cellular and sub-cellular compartments with non-invasive imaging	2000
UNIVERSITETET I TROMSØ - NORGES ARKTISKE UNIVERSITET	Söllinger, Andrea	Winter-is-coming – But do soil microorganisms know and prepare accordingly?	2000
Forskerprosjekt for erfarne forskere (FRIPRO)
UNIVERSITETET I TROMSØ - NORGES ARKTISKE UNIVERSITET	Ghosh, Abhik	Porphyrin Analogues as Advanced Near-Infrared Dyes: Theory, Synthesis, and Applications	12000
UNIVERSITETET I OSLO	Asphaug, Erik	GIANTS: Giant Impact Accretion of Terrestrial Systems	11999
UNIVERSITETET I OSLO	Holm, Martin Blomhoff	Housing, Wealth, and Fertility in High-income Societies	11999
NORGES HANDELSHØYSKOLE	Bütikofer, Aline	Pollution and Health Inequalities: New Perspectives on Long-Term Distributional Consequences of Environmental Policies	11999
NORGES HANDELSHØYSKOLE	Løken, Katrine Vellesen	Labor Market Power, Institutional Structures, and Social Consequences	12000
DIAKONHJEMMET SYKEHUS AS	Bakke, Laura Anne Wortinger	PlacLANG: Linking placental function and language development for early prediction of schizophrenia	11902
UNIVERSITETET I OSLO	Sekulic, Nikolina	Decoding cod centromeres	12000
UNIVERSITETET I OSLO	Malmberg, Karl-Johan	DESIGNK. Designing a synthetic killer based on a natural template	12000
Forskerprosjekt for tidlig karriere (FRIPRO)
SINTEF AS	Masoudi, Mohammad	Multiphysics of salt precipitation during CO2 storage	10000
UNIVERSITETET I OSLO	Galloway, Mathew	OpenHFI: End-to-end Bayesian analysis of Planck HFI	10000
UNIVERSITETET I TROMSØ - NORGES ARKTISKE UNIVERSITET	Kampffmeyer, Michael	MERGE: Multimodal Medical Artificial Intelligence	9998
UNIVERSITETET I OSLO	Proietti, Valerio	Dynamics: Noncommutativity, Groupoids, Homotopy theory (DyNGH)	6013
UNIVERSITETET I TROMSØ - NORGES ARKTISKE UNIVERSITET	Frohlich, Christopher	Forecasting Antibiotic Resistance by Understanding the Evolution of Resistance Enzymes	10000
UNIVERSITETET I OSLO	Rodgers, Samuel	CancER-phagy: Unravelling and targeting ER-phagy in cancer	10000
UNIVERSITETET I OSLO	Wohlwend, Martin	Identification and targeting of noncoding RNA domains in metabolic disease	10000
UNIVERSITETET I OSLO	Li, Yanjiao	Metabolism-Epitranscriptome Crosstalk: Novel Regulation in Embryo Development	10000
UNIVERSITETET I OSLO	Jourdain, Eve	From Individual Behavioral Plasticity to Population Resilience: Killer Whale Adaptation under Environmental Change	10000
UNIVERSITETET I OSLO	Camara, Guilherme Schmidt	GROOVE: Mapping, Modeling, and Perceiving the Combinatorics of Groove-Based Rhythms	10000
Treårig Forskerprosjekt med internasjonal mobilitet (FRIPRO)
UNIVERSITETET I BERGEN	Yangeldina, Dinara	To kill an empire? Russian musical exile in times of war	5609