500 millionar kroner i energistøtte til Ukraina
Pressemelding | Dato: 27.10.2026 | Energidepartementet
Noreg bidrar med 500 millionar kroner i energistøtte til Ukraina inn mot vinteren. Støtta blir gitt innanfor Nansen-programmet og skal bidra til å gjenopprette øydelagd infrastruktur og sikre påliteleg drift av det ukrainske energisystemet.
– Ukraina går snart inn i ein ny krigsvinter. For å sikre ei mest mogleg stabil straumforsyning og unngå store humanitære konsekvensar, er det svært viktig at Ukraina får midlar til innkjøp av utstyr for å styrkje og gjenopprette kritisk infrastruktur som er øydelagd av russisk bombing, seier energiminister Terje Aasland.
Aasland kunngjorde at Noreg vil bidra med 500 millionar kroner i energistøtte i november og desember då han besøkte Ukrainas hovudstad Kyiv tysdag. Pengane er ein del Nansen-programmet si ramme for 2026.
Støtta vil bli utbetalt gjennom Ukraine Energy Support Fund (UESF). Fondet bidrar til at pengane raskt kan omsetjast i konkrete reparasjonar, nytt utstyr og investeringar der behova er størst. Det er opp til Ukraina å prioritere kva som hastar mest no.
Energi ein viktig del av Nansen-programmet
Russlands målretta angrep på energiinfrastruktur i Ukraina har gjort at energisikkerheit er blitt heilt sentralt for Ukraina, og eit hovudinnsatsområde i Nansen-programmet. Sidan fullskalainvasjonen i 2022 har Noreg bidratt med over 16 milliardar kroner til kjøp av gass, reparasjonar av energiinfrastruktur og investeringar i nye løysingar.
Dei gjentatte angrepa frå Russland har påført energianlegg i Ukraina omfattande skadar og gjort energiforsyninga svært sårbar. Dette har skapt eit akutt behov for utstyr for å gjenopprette øydelagd infrastruktur og sikre påliteleg drift av energisystemet.
Totalt gir Noreg 85 milliardar kroner til Ukraina i 2026 gjennom Nansen-programmet. Av dette er dei tildelte energimidlane ein del av den sivile og humanitære støtta på 15 milliardar kroner. 70 milliardar kroner går til militære formål.