Energiministeren besøkjer Ukraina

– Dette besøket er viktig for å vise at Noreg vil halde fram med å støtte Ukraina i den russiske angrepskrigen. Ukrainske energianlegg blir dagleg utsette for målretta russiske angrep, og Noreg vil også framover bidra til å oppretthalde energiproduksjonen. Økonomisk støtte til kjøp av gass og til kjøp av teknisk utstyr som kan brukast i den ukrainske energiforsyninga bidrar til dette, seier energiminister Terje Aasland.

Eit sentralt tema for besøket er at Noreg og Ukraina har mykje å lære av kvarandre, blant anna når det gjeld energiberedskap. Gjennom snart fem år med krig har Ukraina bygd eit motstandsdyktig sivilsamfunn. Beredskap og sikring av kritisk infrastruktur, som energianlegg, er område der Ukraina har opparbeida seg unik kompetanse som Noreg kan lære av.

I Noreg er det Noregs vassdrags- og energidirektorat (NVE) som har det overordna ansvaret for førebyggande sikkerheit og beredskap i kraftforsyninga. Det handlar om å sikre forsyninga av kraft for at samfunnet skal kunne fungere også i ein krisesituasjon, ved å sørge for ei robust kraftforsyning og stabil levering av straum. Både vassdrags- og energidirektør Kjetil Lund og NVEs beredskapsdirektør Kristian Markegård deltek på besøket til Ukraina, for å ta med seg ukrainske erfaringar tilbake til Noreg.

Energi sentralt i Nansen-programmet
– I 2026 er den sivile delen av Nansen-programmet på 15 milliardar kroner i støtte til Ukraina. Energi er det største enkeltelementet i denne støtta med nær 5 milliardar kroner, noko som understrekar kor viktig det er å halde energisektoren i Ukraina i gang. I tillegg er det viktig å skryte av norsk kraftsektor, som heilt sidan 2022 frivillig har donert utstyr til Ukraina, seier Aasland.

Tidlegare i år underteikna Noreg og Ukraina ei felleserklæring om eit strategisk partnarskap, den såkalla Ellisiv-erklæringa. Energi er ein sentral del av dette partnarskapet.