– Eg ser alvorleg på at fleire av årsrekneskapane i sektoren kan ha vesentlege feil og manglar, og alle dei fire etatane må etablera konkrete tiltaksplanar for å lukka avvika, seier forsvarsminister Tore O. Sandvik.

Riksrevisjonen kan ikkje uttala seg om årsrekneskapen til Forsvarsbygg på grunn av manglande revisjonsbevis.

– At ein av etatane våre ikkje kan reviderast, er svært alvorleg. Me har allereie sett i gang ein ekstern gjennomgang av økonomistyringa i Forsvarsbygg. Dette omfattar både prosessar, teknologi og organisering. Gjennomgangen skal resultera i ei tydeleg situasjonsbeskriving, ei vurdering av dette sett opp mot beste praksis for økonomistyring og ein konkret tiltaksplan som bør setjast i verk for å betra økonomistyringa til etaten og internkontroll på kort og lang sikt, seier forsvarsministeren.

Dei pågåande tiltaka til etatane og Forsvarsdepartementets oppfølging

I tillegg til den eksterne gjennomgangen av økonomistyringa i Forsvarsbygg, har Forsvarsdepartementet bede om at etatane utarbeider tiltak som gjer at Riksrevisjonens atterhald kan lukkast så snart som mogleg. Departementet har også fastsett særskilde rapporteringskrav for kvar enkelt verksemd når det gjeld oppfølging av forholda som Riksrevisjonen har påpeika.

Til dømes kan vi nemne fleire tiltak som etatane allereie har sett i verk:

  • Forsvarsmateriell har forbetra den metodiske tilnærminga og styrkt rutinen for periodisering av varemottak.

  • Forsvaret har eit stort tal lagerlokasjonar og mange ulike typar lagerartiklar som skal teljast. Strukturen og eigenskapane på lokala medfører at lagerteljing er svært tidkrevjande. Riksrevisjonen etterlyser ikkje primært fleire teljingar, men eit dokumentert kontrollsystem. Det vil seia ein sentral overordna kontroll som gjer at revisor kan stola på at teljingar, avviksoppfølging og verdijusteringar faktisk skjer, over heile landet og kvart år.

    Forsvaret har gjort greie for årsakene til avvika knytte til varebehaldning og etablert ein tiltaksplan. I 2026 har Forsvaret intensivert oppfølginga av driftseiningane i sin styringsdialog, og iverksett systematisk opplæring og sertifisering innafor lagerstyring. Forsvaret har vidare intensivert lagerteljinga.
  • FFI melder at avvika blir lukka i inneverande år.

Forsvaret

Forsvaret har fått revisjonsrapport med atterhald basert på fire forhold: Behaldning av varer og driftsmateriell, periodisering av kostnader, forpliktingar til framtidig fjerning- og oppryddingskostnadar og dessutan sals- og leigeinntekter. Riksrevisjonen meiner at Forsvaret ikkje har gode nok rutinar for å kontrollera behaldningar av varer og driftsmateriell. Det har vore utfordringar med kontroll av varar og driftsmateriell over lengre tid. Forsvaret innførte periodisert rekneskap etter statlege rekneskapsstandardar (SRS) i 2016, der varelager skal verdsettast i SRS-rekneskapen.

Rutinane i Forsvaret har ikkje vore gode nok til å sikra at verdien i rekneskapen samsvarte med den fysiske varebehaldninga. Forsvaret har heller ikkje etablert ein tilfredsstillande overordna kontroll for å sikra at desse behaldningane blir korrekt bokførte i rekneskapen.

– Økonomireglementet krev god intern kontroll, og Riksrevisjonen har derfor tilrådd at Forsvaret etablerer ein overordna kontroll, inkludert ein fast plan for årleg lagerteljing. Det har me bede Forsvaret om å gjera, seier forsvarsministeren.

Forsvarsmateriell

Forsvarsmateriell har fått revisjonsrapport med konklusjon om at Riksrevisjonen ikkje kan uttala seg om rekneskapslinjene «leverandørgjeld» og «anna kortsiktig gjeld». Dette inneber ein vesentleg risiko for at innkjøp ikkje er bokført på riktig rekneskapsår, og at verksemda ikkje har korrigert tilstrekkeleg til at Riksrevisjonen kunne konkludera med at rekneskapslinjene er utan feil eller manglar.

Forsvarets forskingsinstitutt

Forsvarets forskingsinstitutt har fått ei melding frå revisjonen med atterhald om anleggsmiddel. Dette kjem av at Riksrevisjonen ikkje har fått nok bevis for denne linja i rekneskapen.