Eigarskapsforvaltinga av Mantena AS blir frå neste år overført til Nærings- og fiskeridepartementet
Historisk arkiv
Publisert under: Regjeringen Solberg
Utgjevar: Samferdselsdepartementet
Pressemelding | Nr: 176/19 | Dato: 13.12.2019
Regjeringa har i dag vedtatt å overføre eigarskapsforvaltinga av det heilstatlege togvedlikehaldsselskapet Mantena frå Samferdselsdepartementet til Nærings- og fiskeridepartementet (NFD), med verknad frå 1. januar 2020. Overføringa er i tråd med retningsliner i regjeringas nye eigarskapsmelding.
- Gjennom statleg eigarskap av Mantena syrgjer staten for at det finst ein leverandør av vedlikehalds- og verkstadtenester for skjenegåande materiell i den norske marknaden, seier samferdselsminister Jon Georg Dale.
I eigarsapsmeldinga som regjeringa la fram tidlegare i haust går det fram at statens eigarskap i forretningsmessige selskap bør forvaltas av den sentrale eigarskapseininga i Nærings- og fiskeridepartementet Som oppfølging av det flyttar vi no selskapet.
- Regjeringa forventar at konkurransen i marknaden for togvedlikehald gradvis vil auke, og staten vil som eigar bidra til at Mantena er ein konkurransedyktig aktør i denne marknaden, seier samferdselsministeren.
Statens eigarskapsforvalting av Mantena blir overført frå Samferdselsdepartementet til Nærings- og fiskeridepartementet 1. januar 2020.
Om Mantena AS
Mantena leverer vedlikehaldstenester til togoperatørar, primært vedlikehald av lokomotiv, vogner og motorvogner. I tillegg gjennomfører selskapet vedlikehald på komponentar, og utfører vedlikehald og reparasjonar av skjenegåande arbeidsmaskinar. Selskapet blei fisjonert ut frå Vygruppen (tidlegare NSB-konsernet) til Samferdselsdepartementet i 2017.
For fleire opplysningar – sjå:
- St. 8 (2019-2020) Statens direkte eierskap i selskaper. Bærekraftig utvikling (eigarskapsmelding)
- Pressemelding av 22.november frå Nærings- og fiskeridepartementet: Ny eierskapsmelding
- Nettsida til Mantena AS