Frå i dag kan fleire reise gratis med ferja

Regjeringa har brukt 420 millionar kroner til gratis ferje og til å redusere takstane til 50 prosent samanlikna med takstane 1. januar 2021. Dette kjem i tillegg til dei midlane som allereie har vore brukt til å redusere ferjetakstane.

Det legg til rette for at ferjer til øyer og andre samfunn utan veg til fastlandet frå 16. august kan bli gratis.

– Ei målsetting i Hurdalsplattforma var gratis ferje til øyer og andre samfunn utan vegforbindelse til fastlandet og å gjere alle ferjesamband med under 100 000 passasjerar årleg gratis. Det har vi no lagt til rette for, seier Nygård.

Desse ferjene vert gratis

Regjeringa har lagt til rette for at fylkesvegferjesambanda nedanfor kan bli gratis frå 16. august, og fylkeskommunane har fylgt opp med å vedta takstreduksjonar slik at desse sambanda vert gratis.

Fylke	Samband
Agder	Launes – Kvellandstrand
Møre og Romsdal	Aukra – Hollingsholmen
Møre og Romsdal	Brattvåg – Dryna
Møre og Romsdal	Edøya – Sandvika
Møre og Romsdal	Solholmen – Mordalsvågen
Nordland	Festvåg – Misten
Nordland	Forøy – Ågskardet
Nordland	Horn – Andalsvåg
Nordland	Sandnessjøen – Dønna – Løkta
Nordland	Søvik – Herøy
Rogaland	Mekjarvik – Kvitsøy
Rogaland	Vassøy
Troms og Finnmark	Stornes – Bjørnerå
Trøndelag	Levanger – Hokstad
Trøndelag	Ølhammeren – Seierstad
Vestland	Krokeide – Hufthamar

Oversikt over kva for riks- og fylkesvegferjesamband som blir gratis 16. august og som har blitt gratis tidlegare: https://autopassferje.no/gratis-ferje-fra-01-juli/

Reduserte takstar

Det er fylkeskommunane som ut frå lokale forhold vurderer om dei vil redusere takstane på ferjesambandane på fylkesveg.

Som eit eksempel på kva dette kan bety for dei reisande: Ein pendlar som kvar arbeidsdag reiser tur/retur med ferje mellom Molde og Vestnes i Møre og Romsdal med ein bensin-/dieselbil med AutoPASS-avtale vil spare om lag 18 000 kroner i 2023 samanlikna med det nivået som gjaldt 1. januar 2021.