– Det er ei glede å kunne godkjenne gjenopning av tre felt i Nordsjøen; Albuskjell, Vest-Ekofisk og Tommeliten Gamma. Dei tre felta vil skape store verdiar for felleskapet, og viser betydninga av eksisterande infrastruktur, seier energiminister Terje Aasland.

Statsmininsteren, Steinar Båge, og energiministeren i oransje refleksvest.
Energiministeren kunne dele nyheita med operatøren ConocoPhillips Skandinavia AS og regionsjef Steinar Våge då dei møttest i Stavanger på eit innspelsmøte med olje- og gassnæringa. Her saman med statsminister Jonas Gahr Støre. Foto: Energidepartementet.

Selskapa som står bak dei tre utbyggingane er Vår Energi, ConocoPhillips, ORLEN og Petoro. Alle felta består av gass med noko kondensat og ligg i den sørlege delen av Nordsjøen, om lag 5-10 kilometer vest for Ekofisk. Rettshavarane omtaler utbyggingane som Previously Produced Fields (PPF).  

Felta skal byggjast ut med fire havbotnanlegg knytte til eksisterande infrastruktur på Ekofiskfeltet. Dei totale investeringane for dei tre felta er rekna til om lag 19 milliardar kroner og produksjonsstart er planlagd i 2028 med produksjon til 2048.

Utbyggingane er venta å gi store verdiskapings- og sysselsetjingseffektar i Noreg. Utbygging og drift av felta er venta å gi om lag 7 600 årsverk totalt over levetida, med det største behovet for arbeidskraft i utbyggings- og oppstartsfasen.

Utbyggingane vil auke gassproduksjonen i Ekofiskområdet. Dei forventa utvinnbare ressursane er på 90-120 millionar fat oljeekvivalentar. Felta vil i all hovudsak produsere gass, men også noko kondensat. Gassen vil bli eksportert til Emden i Tyskland, medan kondensatet vil bli eksportert til Teesside i Storbritannia.

– Norsk produksjon av olje og gass er eit viktig bidrag til energitryggleiken i Europa. Utbygging av nye gassfelt bidreg til at Noreg kan halde oppe høge leveransar på sikt. Dette har vorte viktigare etter Russlands fullskalainvasjon av Ukraina og konflikten i Midtausten, seier Aasland.

Bakgrunn

Vest Ekofisk, Albuskjell og Tommeliten Gamma vart funne på 1970-talet og sett i produksjon mellom 1977 og 1988. I 1998 vart alle tre felta stengde ned som følgje av ei ombygging på Ekofiskfeltet.

ConocoPhillips Skandinavia AS er operatør for begge utbygningane. I Albuskjell og Vest Ekofisk er rettshavarane Vår Energi ASA (52,284 %), ConocoPhillips Skandinavia AS (35,112 %), ORLEN UPSTREAM Norway AS (7,604 %) og Petoro AS (5 %).

I Tommeliten Gamma er rettshavarane ORLEN UPSTREAM Norway AS (62,61 %), ConocoPhillips Skandinavia AS (28,26 %) og Vår Energi ASA (9,13 %).

PPF er ei samla utbygging av tre tidlegare produserande felt i Ekofiskområdet. Dei to ulike rettshavargruppene har bede om ei godkjenning av kvar sin utbyggingsplan; ein for Albuskjell og Vest Ekofisk, og ein for Tommeliten Gamma. Felta skal utviklast med fire nye havbotnrammer, som blir knytte til Ekofisksenteret for vidare prosessering og eksport. Planlagd oppstart av første gassproduksjon er i slutten av 2028.