Presseinvitasjon:
Helse- og omsorgsministeren og arbeids- og inkluderingsministeren til Akershus og Innlandet 27. januar
Nyheit | Dato: 26.01.2026 | Helse- og omsorgsdepartementet, Arbeids- og inkluderingsdepartementet
I samband med prosjektet «Ei friskare befolkning» skal helse- og omsorgsminister Jan Christian Vestre og arbeids- og inkluderingsminister Kjersti Stenseng på fleire felles besøk tysdag 27. januar. Prosjektet «Ei friskare befolkning» handlar mellom anna om auka samarbeid i skjeringspunktet mellom arbeid og helse, med mål om redusert sjukefråvær og at færre fell ut av arbeidslivet. Praktiske døme på slikt samarbeid er tema for fleire av besøka.
Pressa er velkomne til å delta på heile eller delar av reisa.
Program
08.50: Clarion Hotel Gardermoen
Adresse: Hans Gaarders veg 15, 2060 Gardermoen
Tema for besøket: Oppfølging av sjukefråvær og tilrettelegging.
Statsrådane får høyre korleis hotellet har arbeidd med sjukefråvær og førebygging, særleg knytt til psykososialt arbeidsmiljø. Hotellet har, ved hjelp av verktøy frå Nav, godt partssamarbeid og høg merksemd på rettar og plikter, redusert sjukefråværet det siste året.
11.15: Hernes institutt
Adresse: Instituttvegen 34, 2410 Hernes
Tema for besøket: Arbeidsretta rehabilitering.
Hernes institutt har lang erfaring med tverrfagleg samarbeid innan rehabilitering, og vil dele sine erfaringar i arbeidet med meir tverrfagleg og tverrsektorielt samarbeid.
13.00: Brumunddal legesenter
Adresse: Nygata 22B, 2380 Brumunddal
Tema for besøket: Samspelsprosjektet.
Legesenteret er ein del av piloten Samspelsprosjektet 2024–2026, som blir samfinansiert av Arbeids- og inkluderingsdepartementet og Helse- og omsorgsdepartementet. I prosjektet har lege, kognitiv terapeut og Nav eit strukturert samarbeid for å hjelpe pasientar tilbake frå sjukefråvær eller finne løysingar som hindrar sjukefråvær. Legesenteret vil dele erfaringane sine frå pilotarbeidet så langt.
14.45: Lillehammer vidaregåande skule, avdeling sør
Adresse: Storgata 25, 2609 Lillehammer
Tema for besøket: Folkehelse og psykisk helse blant unge.
I «Ei friskare befolkning» handlar delar av arbeidet om å styrke folkehelsa. Folk skal få betre føresetnader for å leve friskare liv. Innlandet fylkeskommune har sett i gang Ungdommens livskvalitetsfond, der ungdomane sjølve finn fram til og gjennomfører tiltak som fremjar meistring, livskvalitet og psykisk helse. Statsrådane får møte ungdomar for å høyre erfaringane deira med tiltaka.
Kontaktperson for arbeids- og inkluderingsminister Kjersti Stenseng: Jonas Unstad. E-post: jonas.unstad@aid.dep.no. Mobil: 479 35 382
Kontaktperson for helse- og omsorgsminister Jan Christian Vestre: Hallvard Barbogen. E-post: halb@hod.dep.no. Mobil: 997 69 149