Regjeringa startar arbeidet med ein ny og spissa handlingsplan for førebygging av sjølvmord med eit stort innspelsmøte torsdag 25. november klokka 10.00–12.00. Meir enn 20 organisasjonar som arbeider med tematikken er inviterte. Helse- og omsorgsminister Jan Christian Vestre innleier og deltar.
Sjølvmord er eit alvorleg samfunnsproblem. Effektiv førebygging føreset ei brei satsing som involverer mange sektorar. Interesseorganisasjonar, ideelle og frivillige aktørar har verdifull kunnskap og erfaringar som er viktig å få med i arbeidet med ein ny plan. Den nye handlingsplanen vil ta utgangspunkt i erfaringar frå den pågåande handlingsplanen for førebygging av sjølvmord Ingen å miste 2020–2025.
I tillegg vil ein sjå til ny kunnskap på sjølvmordsfeltet. Det tverrsektorielle perspektivet blir vidareført i den nye handlingsplanen, noko som inneber at tiltaka blir retta mot fleire samfunnsområde enn helse- og omsorgstenestene åleine – og vil inkludere førebygging både i befolkninga generelt og i helsetenesta.
Den nye handlingsplanen skal vere meir spissa enn den førre, og inkludere samanhengen mellom økonomiske problem og sjølvmord, samt ivareta eit tydeleg kjønns- og mangfaldsperspektiv.
Tid: Tysdag 25. november klokka 10.00–12.00
Stad: Akersgata 64
Pressekontakt er seniorrådgjevar Anne Kathrine Aambø. Ver merksam på at det krevst gyldig legitimasjon for å få tilgang til lokalet. Som gyldig legitimasjon blir førarkort (ikkje elektronisk), nasjonalt ID-kort eller pass rekna.