Lanserer Boligdugnaden.no – Vi treng fleire utleigebustader til flyktningar, studentar og andre
Pressemelding | Dato: 13.06.2023 | Kommunal- og distriktsdepartementet
Har du plass til overs? Ein tom bustad, hybel eller fritidsbustad som du kan leige ut? Noreg treng fleire utleigebustader både til flyktningar, studentar og andre. Kommunal- og distriktsminister Sigbjørn Gjelsvik inviterer no til bustaddugnad.
Krigen i Ukraina sender framleis mange på flukt. Over 40 000 flyktningar er busette i alle landets kommunar det siste året. Det kjem framleis mange flyktningar kvar einaste dag til Noreg. Det er høgt press i leigemarknaden og prisane stig. Til hausten skal også mange studentar ha ein plass å bu.
–Vi treng no fleire utleigebustader over heile landet. Den raskaste måten å få dette til på, er å ta i bruk tomme bustader og fritidsbustader. Derfor inviterer regjeringa no privatpersonar med ledig husrom til bustaddugnad, seier Sigbjørn Gjelsvik.
I samarbeid med Direktoratet for byggkvalitet og Husleietvistutvalet, lanserer regjeringa no nettsida boligdugnaden.no for å gjere det litt lettare for deg å sette i gang med å leige ut.
På boligdugnaden.no finn du viktig og relevant informasjon om kva du må gjere før du leiger ut, undervegs i leigeforholdet og korleis du går fram for å finne ein leigebuar. Alt samla på ein stad.
–Målet med bustaddugnaden er å gjere deg trygg på kva du må tenke på før du leiger ut. Eg håpar at informasjonen du får på boligdugnaden.no motiverer deg til å leige ut den tomme bustaden, hybelen eller fritidsbustaden du ikkje bruker eller ikkje bruker så ofte. Eg håpar mange blir med på denne dugnaden, seier kommunal- og distriktsministeren.
