– Barne- og ungdomsorganisasjonane er ein viktig del av sivilsamfunnet, og omfattar eit stort mangfald av organisasjonar som alle bidrar til å inkludere barn og unge, seier barne- og familieminister Lene Vågslid.

Den nasjonale grunnstønaden er svært viktig for barne- og ungdomsorganisasjonane og arbeidet deira. Grunnstønaden er frie midlar som kan nyttas til drift og bidrar til ein økonomisk føreseieleg situasjon for organisasjonane.

Den føreslåtte auken i løyvinga, vil bidra til auka aktivitet for barn og unge over heile landet, og til å fremje demokratiske verdiar, medverknad og engasjement hos barn og unge.

Regjeringa gir tilskot til barne- og ungdomsorganisasjonane gjennom nasjonal og internasjonal grunnstønad, og nasjonalt og internasjonalt driftstilskot til paraplyorganisasjonane Landsrådet for Noregs barne- og ungdomsorganisasjonar (LNU), Unge funksjonshemmede og Ungdom og Fritid.

Eit av regjeringa sine viktigaste innsatsområde er å sikre barn og unge gode oppvekstvilkår. Dei frivillige barne- og ungdomsorganisasjonane har ein sentral plass i dette arbeidet. Både som tilbydarar av aktivitetar og fellesskap, og som talerøyr for barn og unge sine stemmer og interesser.