– For Arbeidarparti-regjeringa er det viktig å bidra til å gi kunstnarar ein tryggare økonomi og å gi rom til at dei kan fordjupe seg i eige kunstnarskap. Statens kunstnarstipend er eit av våre viktigaste kunstnarpolitiske verkemiddel for dette. Stipenda bidreg òg til at vi kan skape og ha eit breitt tilbod av kunst og kultur i heile landet, seier kultur- og likestillingsminister Lubna Jaffery (Ap).

Tidlegare kunne utvalet for Statens kunstnarstipend berre gi etableringsstipend for unge kunstnarar til nokre kunstnargrupper. Etter forslag frå utvalet bestemte regjeringa at stipendet skal kunne bli gitt til alle kunstnargruppene. For å sikre at flest mogleg kunstnargrupper kan få midlar til slike stipend i kvotefordelinga, foreslår regjeringa å auke potten til stipendet frå 22,1 millionar kroner i 2026 til 25,9 millionar kroner i 2027.

Storleiken for arbeidsstipend og langvarige stipend er også foreslått auka frå 342 193 kroner til 354 801 kroner for 2027.

Ei ny forskrift for Statens kunstnarstipend tredde i kraft 1. juli 2026, og stipend vil bli tildelt etter ny forskrift frå 2027.