Oppmodar kommunane om å beskytte myra mot nedbygging

– Arbeiderparti-regjeringa er oppteken av å stanse bit for bit nedbygginga av verdifull natur. Det er viktig å stanse nedbygging av myr både for å ta betre vare på naturen, og det er eit viktig klimatiltak da det hindrar utslepp av klimagassar som har vore lagra i fleire tusen år. Eg forventar at kommunane tek dette på alvor og planlegg i tråd med føringane som allereie ligg føre, seier klima- og miljøminister Andreas Bjelland Eriksen.

I eit felles brev til alle landets statsforvaltarar og kommunar understrekar de to ministerene kor viktig det er å ta vare på myr i arealplanlegginga.

Bakgrunnen er at Miljødirektoratet sende eit forslag om forbod mot nedbygging av myr på høyring 2. juli i år på vegne av dei to departementa. Statsrådane ber no kommunane og statsforvaltarane om å ta omsyn til gjeldande nasjonale forventningar og statlege planretningslinjer i påvente av eit eventuelt framtidig forbod.

– Kommunane har ei nøkkelrolle i arealforvaltninga. Vi ønskjer å gi tydelege signal om at myr og andre karbonrike areal må vernast så langt som mogleg. Det handlar om å ta vare på både klima og naturmangfald, seier kommunal- og distriktsminister Bjørnar Selnes Skjæran.

Kommunane bør vurdere behovet for å revidere gjeldande planar og fjerne eller redusere område der det er opna for nedbygging av myr.

Brevet viser til fleire nasjonale dokument som allereie slår fast at nedbygging av myr og andre karbonrike areal skal unngåast. Dette gjeld mellom anna:

Nasjonale forventningar til regional og kommunal planlegging 2023–2027

Statlege planretningslinjer for klima og energi

Statlege planretningslinjer for arealbruk og mobilitet

Revidert rundskriv T-2/16 om miljøforvaltninga si innsigelsespraksis

Forslaget til forbod mot nedbygging av myr er no ute på høyring med frist 1. november. Høyringsinnspel kan sendast via Miljødirektoratet sine nettsider.

Les brevet her.

Les høyringsforslaget her.