Nesten alle kommunar søkte på Helseteknologiordninga

I 2026 er Helseteknologiordninga varig styrka med 50 millionar kroner, noko som gir eit samla tilskotsramme på 199 millionar kroner. 

Til saman 344 av landets 357 kommunar – og alle landets 15 fylkeskommunar – deltar i minst éin søknad, og dei har søkt om tre gangar så mykje som den summen som er utlyst.

– Noreg skal ha verdas mest digitaliserte helseteneste. Derfor satsar vi på Helseteknologiordninga og styrka den med 50 millionar kroner i statsbudsjettet for i år. Det gjer at fleire gode prosjekt kan få støtte, seier helse- og omsorgsminister Jan Christian Vestre.

Fleire kommunar går saman

Ved tildelinga i fjor blei 309 kommunar og alle fylkeskommunar tildelt midlar. Dei fleste av kommunane går saman om ein eller fleire søknader.

Til dømes er det mange kommunar som er i gang med å skifte ut gammaldagse pasientjournalar. Helseteknologiordninga har prioritert støtte til desse prosjekta. Eit døme er Bodø og 21 andre kommunar i Nordland og Troms som har gått til anskaffing av ei ny journalløysing som gir over 240 000 innbyggarar og 13 000 helsepersonell eit moderne og meir effektivt arbeidsverktøy.

– Helseteknologiordninga har utløyst stor aktivitet i kommunane, og har blitt eit viktig verkemiddel for å styrke digitaliseringa i kommunane. Ikkje minst seier også leverandørane at ordninga verkar som ein motor, og at det er ein fordel for både kunde og leverandør når fleire kommunar samarbeider om anskaffingar, seier Vestre.

– Framover må vi klare å bruke dei ressursane vi har i helsetenesta vår mest mulig effektivt. Helseteknologiordninga er eit avgjerande verktøy for at kommunar kjem i gang med nye løysingar, slik at vi får til nettopp dette.

Fordeling av midlane

Kven som blir tildelt midlar blir kjent i midten av februar.

Helsepersonellsparande teknologi innan journalløysingar, velferdsteknologi og digital heimeoppfølging blir prioriterte ved tildelinga.