– Det er stort behov for meir energi i Asia, og denne garantien gjer det mogleg å investere i fornybar energi som kan dekkje behovet utan auka klimagassutslepp, seier utviklingsminister Åsmund Aukrust.  

Noreg stiller ein garanti på 100 millionar dollar. Dermed kan banken frigjere kapital og låne ut meir enn han elles kunne gjort. Den norske garantien er venta å utløyse 450 millionar dollar i nye lån til fornybar energi. 

Energibehovet i Asia og Stillehavsregionen aukar, samtidig som fossile energikjelder framleis dominerer energiforsyninga. Meir fornybar energi kan møte noko av den aukande etterspurnaden og samtidig avgrense utsleppa av klimagassar. 

– Denne garantien gjer det mogleg for Den asiatiske utviklingsbanken å auke utlåna til fornybar energi betydeleg, og illustrerer at garantiar er kostnadseffektiv bistand, seier Aukrust. 

Avtalen blir den tredje garantien under Noregs statlege garantiordning for fornybar energi i utviklingsland.  

FAKTA

Den norske garantiordninga for fornybar energi

  • Garantien er ein del av IF-CAP (Innovative Finance Facility for Climate in Asia and the Pacific Financing Partnership Facility), ei ordning som skal gjere det mogleg for Den asiatiske utviklingsbanken å finansiere fleire klimatiltak i Asia og Stillehavsregionen. 
  • Ordninga blei oppretta i 2024 som ei femårig prøveordning. 
  • Norad forvaltar ordninga, som har ei samla ramme på 5 milliardar kroner. 
  • Minst 65 prosent av garantiane skal givast i samarbeid med multilaterale utviklingsbankar.