Regjeringa har vedtatt å styrke den norske representasjonen på Grønland ved å opprette eit generalkonsulat med ein utsend norsk generalkonsul.

– Nordområda er Noregs viktigaste strategiske satsingsområde, og Arktis får stadig større betydning for internasjonal politikk og tryggleik. Grønland er ein nær partnar for Noreg, og med eit generalkonsulat i Nuuk styrker vi både den politiske kontakten og samarbeidet om felles interesser i regionen, seier statsminister Jonas Gahr Støre.

– Eit generalkonsulat i Nuuk vil gi oss tettare kontakt med grønlandske styresmakter, næringsliv og sivilsamfunn. Det vil styrke samarbeidet der Noreg og Grønland allereie har sterke felles interesser, som fiskeri, maritime spørsmål og urfolksspørsmål. Det gir oss betre moglegheiter til å utvikle nye samarbeidsområde i åra som kjem, seier utanriksminister Espen Barth Eide.

Samtaler med Grønland og Danmark

Eide har hatt telefonsamtalar med Múte B. Egede, den grønlandske ministeren for utanrikssaker, næring og handel, og den danske utanriksministeren Lars Løkke Rasmussen for å informere om avgjerda.

– Eg opplever at dette blir svært godt mottatt på Grønland og i Danmark. Canada, Frankrike, Island, USA og EU har eigne diplomatar i Nuuk.  Då er det naturleg at Noreg òg har det, seier Eide.

Sidan Grønland er ein del av Kongeriket Danmark, vil generalkonsulatet i Nuuk vere knytt til den norske ambassaden i København og formelt underlagt ambassadøren der.

Noreg har hatt honorært generalkonsulat i Nuuk sidan 1986. Til forskjell frå eit generalkonsulat er eit honorært generalkonsulat drive av ein lokal representant, som ikkje er utsend diplomat.

Fakta om utanrikstenesta

  • Utanrikstenesta har om lag 1400 tilsette.
  • Vel 600 av desse arbeider til ein kvar tid ved Noregs 90 utanriksstasjonar, saman med rundt 1100 lokalt tilsette.
  • Om lag 120 av dei utsende ved utanriksstasjonane kjem frå andre departement og etatar.