Noreg tek opp att samarbeidet med Ungarn gjennom EØS-midlane
Pressemelding | Dato: 26.10.2026 | Utanriksdepartementet
Utanriksminister Espen Barth Eide underteikna i dag ein ny avtale med Ungarn om EØS-midlar på om lag 2,7 milliardar kroner. EØS-midlane er eit viktig verkemiddel i den aktive europapolitikken til regjeringa for å bidra til eit grønt, demokratisk og motstandsdyktig Europa.
Avtalen vart underteikna i samband med besøket utanriksministeren hadde i Budapest 26. oktober. Island og Liechtenstein underteikna òg avtalen.
– Eg er glad for at vi har signert ein ny avtale om EØS-midlar med Ungarn. Denne avtalen gir nye og spennande moglegheiter for samarbeid mellom dei to landa våre. I ei uroleg tid prega av press på demokratiske verdiar og prinsipp er det gledeleg at vi no kan bidra til å styrkje og fremje demokrati, rettsstat og menneskerettar i Ungarn. Eit sterkare og meir demokratisk Europa er òg i Noregs interesse, seier utanriksminister Espen Barth Eide.
Gjennom midlane skal Noreg mellom anna samarbeide med Ungarn for å byggje opp att og styrkje demokratiske institusjonar, rettsstaten og godt styresett. Dette omfattar samarbeid om mediefridom og informasjonsintegritet.
Under besøket i Budapest har utanriksminister Eide samtalar med statsminister Péter Magyar, utanriksminister Anita Orbán og finansminister András Kármán.
Skal bidra til å redusere forskjellar i Europa
EØS-midlane er Noregs bidrag til å redusere sosiale og økonomiske forskjellar i Europa og styrkje Noregs samarbeid med mottakarlanda.
15 land er kvalifiserte til å få EØS-midlar. Med underteikninga med Ungarn i dag er det inngått avtalar med alle dei 15 mottakarlanda for inneverande periode.
– Avtalen opnar eit nytt kapittel i forholdet mellom dei to landa våre. Midlane vil kome befolkninga i Ungarn til gode og støtte opp under reformene til Magyar-regjeringa for å gjenopprette demokratiet, seier Eide.
Om avtalen
- 254,1 millionar euro er sette av til samarbeid med Ungarn gjennom EØS-midlane for perioden 2021–28.
- Perioden varer formelt til 2028, med høve til utbetalingar til og med april 2031.
- Noreg dekkjer rundt 97 prosent av beløpet, medan Island og Liechtenstein finansierer resten.
- Eit eige program skal styrkje eit fritt og uavhengig sivilsamfunn, slik at organisasjonane kan spele ei aktiv rolle i å utvikle demokratiet og samfunnet i Ungarn. Støtta blir forvalta uavhengig av ungarske styresmakter.
- Eit anna område er grøn omstilling, der samarbeidet skal bidra til ei meir diversifisert energiforsyning og overgangen til rein energi.
- Seks norske fagetatar er involverte som partnarar i gjennomføringa av programma.
For perioden 2021 til 2028 skal Noreg saman med Island og Liechtenstein bidra med 3,268 milliardar euro til 15 av dei mindre velståande medlemslanda i EU.
Prioriterte område er:
- Grøn omstilling
- Demokrati, rettsstatsprinsipp og menneskerettar
- Sosial inkludering og samfunnsmessig robustheit
183 millionar euro av totalbeløpet er øyremerkte tiltak i mottakarlanda for å bidra til å handtere konsekvensane av Russlands krigføring i Ukraina.
I tillegg er drygt 300 millionar euro av totalbeløpet øyremerkte eit fond som skal støtte organisasjonar som jobbar med menneskerettar, demokrati og rettsstat i Europa.
Følgjande land er kvalifiserte til å få EØS-midlar denne perioden:
|
Land |
Beløp i millionar euro |
|
Polen |
924,9 |
|
Romania |
596,3 |
|
Bulgaria |
260 |
|
Ungarn |
254,1 |
|
Tsjekkia |
225,2 |
|
Hellas |
159,3 |
|
Kroatia |
133,1 |
|
Slovakia |
130,7 |
|
Portugal |
126,3 |
|
Litauen |
117,9 |
|
Latvia |
109,5 |
|
Estland |
71,8 |
|
Slovenia |
50 |
|
Kypros |
17,6 |
|
Malta |
11,2 |