– Villreinen er under sterkt press. Skal vi klare å ta vare på den for framtidige generasjonar, treng vi gode tiltak. Tiltaksplanane for villreinområda er vårt viktigaste bidrag for å snu den negative utviklinga for villreinen. No foreslår vi å styrke innsatsen ytterlegere, seier klima- og miljøminister Sigrun Aasland.

90 prosent av all europeisk villrein er i Noreg. Vi har derfor eit særskilt internasjonalt ansvar for å ta vare på han. Skal villreinen klare å overleve, må han ha større område med mindre forstyrringar å leve på.

Vi foreslår derfor å styrke innsatsen med 40,5 millionar kroner i årets budsjett. Dette inkluderer 25 millionar kroner frå Statens villreinfond.

Pengane vi no set av skal mellom anna gå til enkelttiltak som å stenge turisthytter, flytte og stenge ned vegar og legge ned enkelte parkeringsplassar og rasteplassar. Pengane skal òg gå til å styrke statsforvaltaren si oppfølging av tiltaksplanane og finansiere informasjonsarbeidet i Statens naturoppsyn.

– Skal vi klare redde villreinen må vi gjere ei rekke tiltak samtidig. Vi held fram samarbeidet med både lokale og regionale styresmakter, frivillig sektor og private for å følge opp arbeidet, seier klima- og miljøministeren.