– Skal vi sikre ein levedyktig villreinbestand i Setesdal for framtida, må vi gi villreinen betre moglegheiter for å trekke mellom ulike delar av fjellområdet. Derfor legg vi no fram viktige og nødvendige tiltak, seier klima- og miljøminister Sigrun Aasland.

Villreinen i setesdalsområdet er utfordra av at kraftutbygging, vegar og hytteområde deler opp leveområda og gjer det vanskelegare å trekkje mellom viktige beiteområde. Dette blir forsterka av ferdsel og aktivitet i fjellet som reduserer arealbruken og gjer villreinen meir sårbar. Tilstanden til villreinen i Setesdal Ryfylke er klassifisert som dårleg, medan den i Setesdal Austhei er klassifisert som middels.

Tiltaksplanen inneheld 85 tiltak, fordelt på 11 tiltakspakkar. Tiltaka omfattar mellom anna arealplanlegging og arealforvaltning, regulering av ferdsel på vegar og annan ferdsel, villreinhelse, bestandsforvaltning og restaurering. Planen inneheld òg konkrete, områdespesifikke tiltak som i stor grad er ferdselsregulerande tiltak knytt til vegar, hytte- og løypenett, annan infrastruktur og jakt. Målet er å reetablere passasjar villreinen har brukt tidlegare og ta vare på dei trekkpassasjane villreinen bruker i dag.

Det har i arbeidet med tiltaksplanen vore lagt stor vekt på brei involvering av kommunar, fylkeskommunar og andre aktørar, mellom anna gjennom fleire folkemøte og møte med kommunar og andre aktørar.

– Gode innspel har styrkt planen, og eg oppfattar at det er brei semje om å ta vare på villreinen. No startar arbeidet med å gjennomføre tiltaka, og eg ser fram til det vidare samarbeidet med lokale og regionale styresmakter og andre aktørar, seier klima- og miljøministeren.

Villreinmeldinga som regjeringa la fram i 2024, og handsaminga i Stortinget, dannar ei ramme for arbeidet med tiltaksplanane for norske villreinområde. Tiltaksplanane er ikkje juridisk bindande, men er ein samla oversikt over tiltak som skal søkjast gjennomført av styresmakter på statleg, fylkeskommunalt og kommunalt nivå, frivillige organisasjonar, rettshavarar, grunneigarar og andre aktørar i villreinområda.

Tiltaka i tiltaksplanen omhandlar til dømes:

  • Revidere kommunale planar (planvask) og basere framtidig utbygging på oppdatert kunnskap og ei sterkare vektlegging av omsyn til villrein
  • Reduksjon og tilpassing av motorferdsel i utmark i villreinområde
  • Samla vurdering av nasjonale infrastrukturprosjekt for å gjenopprette trekk mellom villreinområde og forbetre tilstanden til villreinen fram mot 2050.
  • Omlegging av hytte- og løypenett ved Storsteinen
  • Vurdere permanent stenging av anleggsvegen til Store Urevatn for allmenn motorisert ferdsel etter avslutta prøveperiode
  • Vurdere tiltak for å redusere barriereeffekten av Brokke-Suleskardvegen
  • Omlegging av hytte- og løypenett ved Rosskreppfjorden
  • Vurdere å utsetje maskinpreparering av løyper i Hovdenområdet
  • Oppfordring til å ta ut planar om vidare utbygging av fritidsbustader i trekkområde for villrein rundt Bjørnevatn
  • Vurdere tiltak for å oppretthalde framtidig trekk mellom Setesdal Ryfylke og Setesdal Austhei