– Det er ei glede å kunne ta imot utbyggingsplanar for nye funn i Gjøaområdet. Utbyggingane vil skape store gevinstar for fellesskapet og bidra til å forlengje levetida for viktig infrastruktur på norsk sokkel, seier energiminister Terje Aasland.

Vår Energi ASA er operatør for dei tre utbyggingane.

Funna består av olje, gass og kondensat og er lokaliserte i den nordlege delen av Nordsjøen, 50 kilometer nordaust for Trollfeltet. Funna skal byggjast ut med to havbotnanlegg knytte til eksisterande infrastruktur på Gjøafeltet.

Produksjonsstart er planlagd i 2027 for Cerisa og i 2028 for Gjøa Nord og Ofelia.

Utbyggingane vil auke produksjonen i Gjøaområdet, og dei forventa utvinnbare ressursane er 76 millionar fat oljeekvivalentar.

Bakgrunn

Gjøa Nord, Ofelia og Cerisa er tre funn i Gjøaområdet. Utbyggingane går under namnet Gjøa Subsea Projects (GSP).

Vår Energi ASA er operatør for dei tre utbyggingane.

I utvinningsløyva 153 og 153 C (Gjøa Nord) er rettshavarane Vår Energi ASA (30 prosent), Petoro AS (30 prosent), Harbour Energy Norge AS (28 prosent) og OKEA ASA (12 prosent).

I utvinningsløyve 929 (Ofelia) er rettshavarane Vår Energi ASA (40 prosent), Harbour Energy Norge AS (20 prosent), Aker BP ASA (10 prosent), Pandion Energy AS (20 prosent) og DNO Norge AS (10 prosent).

I utvinningsløyve 636 (Cerisa) er rettshavarane Vår Energi ASA (30 prosent), INPEX Idemitsu Norge AS (30 prosent), Orlen Upstream Norway AS (30 prosent) og DNO Norge AS (10 prosent).

Det blir levert totalt tre utbyggingsplanar: ein plan for utbygging og drift (PUD) for Gjøa Nord, ein PUD for Ofelia og ein søknad om fritak frå PUD for Cerisa. At dei tre planane blir sett i samanheng legg til rette for kostnadseffektive utbyggingar.

Planlagd oppstart er i 2027 for Cerisa og i 2028 for Gjøa Nord og Ofelia. Dei forventa utvinnbare ressursane frå Gjøa Nord, Ofelia og Cerisa er anslått til totalt 76 millionar fat oljeekvivalentar olje og gass.

Utbyggingane er venta å gi betydelege verdiskapings- og sysselsetjingseffektar i Noreg, og dei er venta å gi om lag 3000 årsverk i utbyggingsfasen.